Simpolang mikatkat sa ikaduha

CEBU, Philippines - Temporaryong nasakmit sa Simpolang Barbekyuhan ang ikaduhang puwesto human ilang gilampurnas ang Kharoz, 93-80 sa 2nd F. Llamas Youth Association (FYA) basketball tournament didto sa Vicente Sotto Memorial Gym sa Brgy. Punta Princesa, ning dakbayan.

Sa laing duwa, ang Heartfelt midaog batok sa Park 'N Go Bakeshop, 90-86 pinaagi sa lima ka sunod-sunod nga free throws sa katapusang 39 segundos.

Sila si Poloy Aglipa ug Nico Laborte maoy nangu alang sa Simpolang pinaagi sa ilang 20 ug 15 puntos matag usa. Ang Simpolang nagbitbit karon og 4-2 nga baraha.

Ang Kharoz, kinsa naghupot na karon og 3-3 nga baraha, gipangulohan ni Crissar Llegunas pinaagi sa iyang 22 puntos, samtang si Mark Reave Arias midugang og 21 puntos.

Sa laing bahin, mibalitok ang Heartfelt gikan unta sa nag-ung ong nga kapildihan pinaagi sa pagpasulod og lima ka sagunson nga free throws aron modaog og kuwatro puntos.

Unang nakapasulod og duha ka free throws si Fel Pardenilla aron ibalik ang labaw ngadto sa Heartfelt, 87-86 ug gisundan sa split charities ni ex-USJR Jaguar Giovanni Canceko alang sa 88-86 nga labaw.

Hingpit nga gibaswat ni Johnver Arreglo ang Heartfelt dihang miposa siya’g laing duha ka free throws alang sa 90-86 nga kadaugan.

 Si Tata Laborte maoy nangu sa Heartfelt pinaagi sa pagpabuto og 22 puntos, apan ang duha ka crucial free throws ni Pardenilla, kinsa miamot og 21 puntos maoy daku’g natabang sa kadaugan.

Ang FYA gidumala ni tournament director Boogie Atillo ug gipaluyohan ni Punta Princesa barangay councilor Ray Gabriel Salgado.

Puntos Matag Usa

Unang duwa:

Simpolang (93) - Aglipa 20, Laborte 15, Tabanres 14, Labrador 12, Villaver 10, Medalle 6, Jodon 4, Canete 4, Antiporta 3

Kharoz (80) - Llegunas 22, Arias 21, Atuel 18, Dela Cerna 5, Trinidad 4, Macachor 4, Dacayana 2

Ikaduhang duwa:

Heartfelt (90) - Laborte 22, Pardenilla 21, Canceko 12, Salinas 11, Arreglo 10, Canceko 5, Boycillo 3, Abella 2, Ponce 2

Park ‘N Go (86) - Caballero 39, Reubal 12, Lopez 10, Rama 10, Tolentino 4, Osorio 2, Lanojan 2, Medalle 2. – BANAT NEWS