Viking Haulers misakmit sa liderato

CEBU, Philippines -  Giilogan sa Viking Haulers ni playing coach Baeng Medalle   ang Simpolang Barbekyuhan sa unang puwesto human sila mo-iskor og 103-96 nga kadaugan aron magsolo sa liderato sa F.Llamas Youth Association (FYA) basketball tournament diha sa Vicente Sotto Memorial Gym sa Brgy. Punta Princesa.

Aron mailog og balik sa Simpolang ang unang puwesto ug makakuha'g twice-to-beat advantage alang sa semifinals sunod semana, kinahanglan nga haruson ang katapusan nilang duha ka duwa batok sa Kharoz karong Martes ug sa Heartfelt unya sa Huwebes.

Si Dodong Cabigas maoy nangu sa Viking sa iyang 23 puntos, samtang si Toper Limbaga midugang og 15 puntos aron baswaton ang ilang team ngadto sa 4-1 nga baraha diin naglabaw lang sila’g usa ka daog batok sa Simpolang nga adunay 3-2 nga baraha.

Laing tulo ka players sa Viking ang misakmit sab og double figures lakip na niini si Baeng.

Sila si Botoy Tabares ug Ryan Villaver parehong miposa og 16 puntos alang sa Simpolang samtang si Bryan Antiporta miposa og lima ka three points sa iyang 15 puntos. Sama sa Viking, tulo sab ka players sa Simpolang ang mi-iskor og double figures.

Sa laing duwa, ang CRV midaog batok sa Leo & Rolly sa iskor nga 99-86 alang sa ilang 3-1 nga baraha.

Si Dondon Cadungog maoy nangu sa CRV pinaagi sa iyang 26 puntos, gisundan ni Rovel Tabar nga adunay 22 puntos.

Nausik ang 32 puntos nga nahagdaw ni Royce Sonsona, kinsa maoy nangu sa Leo & Rolly kay wala siya makakuha og igong suporta sa iyang kaubanan. Si Bornong Endrina maoy ikaduhang player nga mi-iskor og double figures nga adunay 15 puntos.

Ang FYA gipaluyohan nilang tournament director Boogie Atillo ug Punta Princesa brgy. councilor Ray Gabriel Salgado.

PUNTOS MATAG USA

Unang duwa:

Viking (103) - Cabigas 23, Limbaga 15, Martillan 11, Sabalande 10, Medalle 10, Canceko 9, Cal 8, Trinidad 3, Albarracin 2, Pacana 1

Simpolang (96) - Tabares 16, Villaver 16, Antiporta 15, Labrador 11, Laborte 11, Aglipa 10, Canete 9, Medalle 8

Ikaduhang duwa:

CRV (99) - Cadungog 26, Tabar 22, Navarro 21, J. Abellana 14, Ylanan 9, Abellana 2

Leo & Rolly (86) - Sonsona 32, B. Endrina 15, Tundag 10, Abella 6, Endrina 6, Jabonero 5, Canete 4, Zapanta 2   (BANAT NEWS)