Sunsport Basketball Training Camp sugdan Abril 5

CEBU, Philippines - Ang 17th season sa Sunsport Basketball Training Camp, mosikad karong Abril 5 diha sa Sacred Heart Center Sports Club basketball courts, ning siyudad.

Ang naasoy'ng training camp bukas sa tanang mahiligon og basketbol nga nag-edad og siyete anyos ug pataas.

Ang labing taas ug maayong pagkadumala nga cage clinic adunay duha ka bulan nga training schedule gikan sa Abril 5-30 ug Mayo 3-28 uban ang duha ka oras nga session gikan sa alas-8 hangtod sa alas-10 sa buntag atol sa weekdays.

“It’s our 17th year now teaching fundamental basketball skills to kids that gave them advantages over other players in their respective schools,” matud ni organizer Andrew Choachuy.

Gawas sa fundamentals sa duwa sama sa proper shooting, dribbling ug passing, si training camp director Giovannie 'Jojo' Romarate motudlo sab og teknikal nga aspeto sa paugnat sa kusog lakip ang offensive drills ug defensive strategies.

Si Romarate maoy head coach sa Salazar Institute of Technology (SIT) Skyblazers sa secondary ug collegiate basketball teams.

Ang registration nagkantidad og P1,000 matag bulan. Matag partisipante makadawat og Sunsport basketball 2010 model, bag, upper uniform ug white t-shirt.

Ang registration sugdan sa Abril 5 sa alas-8 sa buntag.

Alang sa dugang mga kasayoran labot sa training camp, mahimong motawag sa buhatan sa Sunsport sa telepono 345-1015, 0917-3205769, 0922-8377712, 0921-2338305. – BANAT SPORTS