Kontra nilang Melindo ug Banal mangabot ugma dinhi sa Sugbu

CEBU, Philippines - Mangabot na ugma ang mga langyaw’ng boksidor, kinsa makigsangka sa ALA Boys -- Milan 'Milenyo' Melindo ug AJ 'Bazooka' Banal sa "Bakbakan sa Sinulog" boxing card karong Enero 14 diha sa Pacific Grand Ballroom sa Waterfront-Cebu City Hotel and Casino sa barangay Lahug.

Mag-atubangay usab sa unang higayon ang mga boksidor sa ipahigayong press conference karong Sabado diha sa Patio Isabel.

Si two-division regional champion Melindo (19-0,l 5KOs), kinsa nagtinguhang mosakmit sa iyang ikatulong weight division belt makigharong sa Mexican-American nga si Anthony “Baby Assassin” Villarreal (9-2, 4KOs) alang sa WBC Youth Intercontinental flyweight title.

Samtang ang garbo sa Ermita nga si Banal (20-1, 16KOs) mag-atubang usab og lisud nga tahas batok ni kanhi five-time regional titlist Cecilo “Boga” Santos (24-11-3) sa Mexico.

Hinuon, daan nang gipabuhagay ni ALA president Michael Aldeguer nga dili mga yanong boksidor ang sangkaon nila ni Melindo ug Banal.

Ang kontra ni Melindo nga si Villareal midaog sa katapusang lima niya ka away ug wala pa usab kini matumba sa iyang mga away, samtang si Santos midaog sa katapusan niyang away batok ni Cesar Martinez niadtong Disyembre 11.

Napilde usab ni Santos ang Colombian nga si Luis Melendez, kinsa mao ang boksidor nga miputol sa karera sa boksing ni Z 'The Dream' Gorres niadtong Nobiyembre 13 didto sa Mandalay Bay House of Blues sa Las Vegas.

Mobanat usab sa undercard ang laing ALA prospects nga sila si James Bacon ug Larry 'Bon Jovi' Canillas batok nilang Thittichon Singwancha ug Pet Twin Gym sa Thailand.

Gawas nila ni Bacon ug Canillas, andam na usab ang line-up sa amateur bouts nga naglakip sa Sugbuanong si Adonis Cabalquinto, kinsa makigbinukbukay ni Jimmy Vallares, samtang mopakita usab og aksiyon ang anak ni kanhi Asian Games gold medalists ug two-time Olympian Elias Recaido nga si Karina Jane Recaido.

Ang mga tiket nagkantidad og P1,500 alang sa VIP first row, P1,250 sa VIP second row, P1,000 sa VIP third row, P500 sa ringside, P300 sa ballroom ug P250 sa balcony.

Ang maong boxing extravaganza gipasiugdahan sa ALA Promotions, SMART Communications ug ABC TV 5.  – BANAT NEWS