Cebu Niños hari sa Quezon Leg

CEBU, Philippines - Gisakmit sa M.Lhuillier Kwarta Padala-Cebu Niños ang titulo sa Smart Liga Pilipinas Conference III Quezon Province Leg human nila tiwasi ang Quezon Red Oilers, 67-62, niadtong Sabado didto sa Quezon Convention Center.

 Sama sa gihapon, ang forward nga si Ariel Mepaña ug ang beteranong guwardiya nga si Stephen Padilla kinsa mipasulod sa mahinungdanun niyang free-throws sa katapusang 30 segundos, maoy mituboy sa Niños ngadto sa kadaugan.

Miamot usab sila si Bruce Dacia, Woodraw Enriquez ug Ian Saladaga og puntos aron ihatag sa Niños ang sayes puntos nga labaw, 60-54, sa naghinapos nga oras sa duwa.

Ang kanhi University of the Visayas Lancer nga si Mepaña mibugha og 23 puntos, 14 rebounds ug upat ka blocks aron pangulohan ang iyang koponan, gisundan ni Dacia nga midiga og otso puntos. Nidunol usab og sayes puntos ang gibayaw nga MVP nga si Mark Ababon.

Sa ilang bahin, ang naparot nga Red Oilers gipangulohan ni Ramsey Williams nga mipusa og 19 puntos ug siyam ka assist uban ni Jorel Canizares nga mitira og 17 puntos.

 Sa laing bahin, ang defending National Champion Misamis Oriental Meteors mipahiluna sa third place dihang hingpit nilang gipapha ang EKB-Apayao Rapids, 85-70.

Puntos matag usa:

Cebu (67) – Mepana 23, Dacia 8, Saladaga 7, Padilla 7, Ababon 6, Ybanez 5, Enriquez 4, Santos 3, Nailon 2, Basco 2

Quezon (62)- Williams 19, Canizares 17, Pinera 10, Raymundo 6, Suguitan 4, Labagala 4, Magsumbol 2

Quarterscores: 17-11, 34-27, 48-48, 67-62. - Lemuel P. Maglinte (BANAT NEWS)