Ting Bayani sa Cebu Cherish School

CEBU, Philippines - Kalmado kaayong gipasulod ni Josh Elson Ting ang iyang duha ka krusyal nga free throws aron baswaton ang Cebu Cherish School 12-under squad ngadto sa 10-8 nga kadaogan batok sa Southwestern University (SWU) sa kulba-hinam kaayong double overtime sa usa sa mga sangka atol sa pagbukas kaniadtong Sabado sa 1st BTC Cup - Thirsty Hoop Jams didto sa Banilad Town Centre courts sa barangay Baniland, ning dakabayan.

Ang duha ka free throws ni Ting maoy naghatod sa duwa ngadto sa ikaduhang overtime ug siya sab ang nakahatod sa duwa ngadto sa unang overtime pinaagi sa usa ka jumpshot bisan pa sa hugot kaayong depensa nga gipatuman sa SWU players.

Midaog ang Cebu Cherish School pinaagi sa tie-breaking shootout diin si Ting nahimong bayani human sa iyang duha ka free throws.

Hinuon, ang SWU team sa 10-under category mimakmak sa Cebu Eastern College (CEC), 14-7, samtang ang Team A sa PAREF Springdale mipasinaw sa M. Zed Christian School, 10-0 sa mao gihapong category.

Ang upat ka teams sa DBTC nag-unay sa 10-yars under ug midaog ang DBTC 1 batok sa DBTC 2, sa iskor 10-9 nga milanat sab og overtime, samtang ang DBTC 4 naka-upset sa DBTC 3 sa iskor, 8-7.

Ang ubang resulta sa 76 ka duwa kaniadtong Sabado ingon man usab ang hingpit nga team standings makita online sa btc2009cup.wordpress.com pinaagi sa Facebook accounts sa Banilad Town Centre.
Atol sa pormal nga opening ceremonies, ang 348 ka players nga nagparehistro mihatag og pagtamud kang kanhi Presidente Corazon Cojuangco Aquino pinaagi sa paglitok og pipila ka pulong sa pag-ampo alang sa malinawon nga kapahulayan sa iyang kalag ingon man sa pagpangaliya alang sa kausaban sa atong nasud human sa iyang kamatayon.
Kagahapon, nagbagat ang 10-under squads gikan sa Cebu Cherish batok sa Springdale’s Team A samtang ang USC South 3 nakigsangka batok sa USC North 3 ubos sa 12-under category.

Laing duwa kagahapon mao ang DBTC batok Springdale ubos sa 10-under ug 12-under categories ug labing menos 72 pa ka laing duwa ang gipahigayon sa tibuok adlaw kagahapon apan ang resulta niini adto pa sa sunod adlaw mahibaw-an. - Gabby G. Malagar (BANAT NEWS)