Bag-ong lagda sa Milo Marathon

CEBU, Philippines – Magsagubang na sab og dakung hagit ang Cebuano runners nga mosalmot sa 33rd National Milo Marathon kay ang mga nagpasiugda sa tuyo nga dad-on ang kompetisyon ngadto sa mas taas nga level, mopatuman sa ilang bag-ong lagda Cebu leg karong Domingo.

Sukwahi sa mga nangaging   edisyon, ang top three finishers sa men ug women’s division mo-abante ngadto sa national championships, apan matud pa ni Milo Sports executive director Pat Goc-on nga ning higayona ang lumba magsilbe isip qualifying diin kadto lamang mga runners kinsa makaabot sa cut-off time ang makakuha og pasaporte alang sa grand finals nga gikatakda karong Oktubre 11 didto sa Manila.

Matud pa ni Goc-ong nga ang male runners kinahanglan motapos sa 21 kilometer race sud sa usa ka oras ug 15 minutos aron moabante sa national finals ug usa ka oras ug 35 minutos alang sa female runners."Regardless of the number of qualifiers as long as the male runners will get the time of 1:15 and the female runners will have a time of 1:35, they automatically qualify to the National Milo Marathon," matud pa ni Goc-ong atol sa press conference kagahapon diha sa Cebu City Sports Center (CCSC) Conference Room.

Matud pa ni Goc-ong nga gituyo nila nga himuong time trial ang lumba aron masaka pa sa mga Sugbuanon ang ilang limitasyon ug ingon man mabaid ang ilang abilidad paingon ngadto sa national finals.

Ang lumba gibahin ngadto sa 3K Kiddie run, 5K run, 10K provincial run ug 21K qualifying run.

Gawas sa mga winners, ang Nestle Phils. mohatag sab og pasidungog ngadto sa tunghaan nga adunay kinadaghanang partisipante.

Sa laing bahin, ang 14th Milo Little Olympics Visayas qualifying gikatakda karong Septiyembre 4-6, samtang labing unang National Championships gikatakda sa Oktubre 23-25.

Matud pa ni Goc-ong nga migahin sila og minilyon ka pesos alang sa maong sports program nga kabahin sa ilang commitment sa pagdasig sa mga batan-on aron mosalmot sa paugnat sa kusog. – BANAT NEWS