Time Out cage clinic sugdan na

CEBU, Philippines - Pormal na nga sugdan karong adlawa ang Time Out Basketball Clinic diha sa Cebu Coliseum.

Ang Time Out motutok sa mga fundamental sa basketball sama sa proper passing, dribbling, shooting ug footwork.

Nalakip sab sa ilang training module ang values formation ug character education.

Ang training camp gibahin sa duha ka levels -- ang Beginners ug Advanced. Ang beginners magsugod gikan sa alas-8 hangtod sa alas-10 sa buntag, samtang ang advanced gikan sa alas-10 sa buntag hangtod sa alas-12 sa udto.

Modumala sa tinuig nga training camp mao si Rex Salvaña, kanhi assistant coach sa Cebu Gems. Si Salvaña nakaserbisyo sab isip chief bench tactician sa Misamis Oriental Meteors sa nabungkag nga Mindanao Visayas Basketball Association (MVBA).

Moabag ni Salvaña sa maong cage clinic mao si kanhi pro ug commercial star Marcelino ‘Teroy’ Albarillo ug Reggie Licanda,   ang head coach sa University of Cebu (UC) Junior Webmasters sa Cebu Schools Athletic Foundation, Inc. (CESAFI)

Ang usa ka bulan nga clinic bukas sa mga lalaki ug babaye nga nagpangedaron og 17 anyos.

Aduna kini registration fee nga P1,200 matag entrante, libre na ang training jersey ug basketball.

Alang sa dugang mga kasayoran, mahimong motawag ni Frank sa 255-8919 o dili ba sa 0905-6554203. – BANAT NEWS