Binglens daog batok 24/7 apan diriyot mag-away

CEBU, Philippines - Nagkainitay sila si Allain Abellanosa sa ACN/Binglens nga gipaluyohan ni Atan Guardo-atol sa ilang 72-66 nga kadaugan batok sa 24/7 Freight kaniadtong Domingo atol sa nagpadayon nga 1st M.Lhuillier Cup basketball tournament didto sa Cogon, Pardo gym.

Sa sayo pa, ang Asian College of Technology (ACT) Cyber Knights mapungtanon nga mikuso-kuso sa Perfect Freight Forwarders sa iskor, 79-48 nga naghatag sa Cyber Knights og 1-1 nga baraha.

Naka-una na unta ang 24/7 Freight dihang miposte sila'g 40-22 nga labaw sa halftime apan hinay-hinay kining gipapas sa Binglens pagsugod gyud sa third quarter dihang ila gyung nasakmit ang labaw, 52-50 human sa duha ka free throws ni Rey dela Victoria diin wala nay oras padulong sa halftime break.

Human sa duha ka three-point shots ni Abellanosa nga naghatag sa Binglens og 66-59 nga abante, nagkainitay sila ni Paul Norman Joven kinsa hugot kaayong nakadepensa ug gidumbol siya ni Abellanosa hinungdan nga miduol kaniya si Mark Abadia, ang skipper sa 24/7 Freight nga maoy nakasamot sa initay apan maayo nalang gani kay wala madayon ang sinukmagay sa may 2:40 ang nahibiling oras tungod sab sa pagbadlong sa mga referees ug sa gitawag og 'cooler-heads'.

Si Abe Galinato mi-iskor og 13 puntos alang sa Binglens, si Jessie Lumantas midugang og 12 samtang sila si Ope Abellana ug Abellanosa may 11 ug 10 puntos matag usa kanila.

Si Joven Cid Cortes sa USC Warriors ug ang kanhi player sa FEU Tamaraws nga si Paul Alelo Flores parehong may 12 puntos alang sa 24/7 Freight kinsa aduna nay 1-1 nga baraha.                 

Si Elmer Aparice maoy nangu sa Cyber Knights sa iyang 13 puntos samtang laing tulo ka kauban mi-iskor sab og double figures.

Puntos kada usa:

First Game:

ACT (79)—   Aparice 13, Canahap 11, Reyes 11, Pontemayor 10, Valencia 8, Vistal 8, Nuñez 6, Cadiz 6, Paraguya 4, Doy 2

Perfect Freight (48)— Miro 13, Panerio 9, A. Lim 8, Que 8, Sahilan 3, Escudero 2, Ocaña 2

Second Game:

Binglens (72)— Galinato 13, Lumantas 12, Abellana 11, Abellanosa 10, Dela Victoria 8, Abelong 7, Licanda 4, Canceran 3, Garcia 2

24/7 Freight (66)— Cortes 12, Flores 12, Tangarorang 9, Abadia 7, Villagonzalo 5, Dela Rama 5, Jueves 4, Loyola 4, Joven 3, Potencioso 2, Gallarde 1 (Gabby G. Malagar)   (BANAT NEWS)