Abapo, Abines Naghari sa Baroto Regatta

CEBU, Philippines - Nakuha nilang Charlie Abapo ug Marton Abines sa barangay Tanke, Talisay ang unang ganti sa Baroto Regatta, usa ka matang sa lumba sa sakayan diin ang layag ug bugsay mao lamang ang gamiton sa paglawig.

Sa maong kadaugan, naangkon nilang Abapo ug Abines ang P30,000 isip ganti sa ilang pagpahiluna sa unang dapit.

Miangkon sa ikaduha nga dapit mao sila si Francisco Gamboa ug Delfin Pacaldo sa Cordova, gisundan nilang Gilberto Abrero ug Virgilio Jumao-as sa barangay Tanke, Talisay alang sa ikatulo nga dapit.

Sila si Gamboa ug Pacaldo nibulsa og P20,000, samtang sila si Obrero ug Jumao-as nakadawat og P10,000.

Ang sakayan nga gisakyan sa managsuong Lyndon ug Ricardo Sumalinog sa barangay Tanke, maoy napiling most colorful ug ilang nadawat ang P15,000 nga ganti.

Ang Baroto Regatta usa sa mga highlights sa tinuig nga "Takas sa Talisay" celebration.

Si Bise Gobernador Gregorio Sanchez maoy mipabuto sa starting gun timaan sa pagsugod sa lumba.

Mitambong sab si Mayor Adelino Sitoy agi'g pagpakita og suporta sa taga Cordova nga misalmot sa lumba. – BANAT NEWS