Pimentel yabo sa Assessment

CEBU - Ang mas abtik ug kusog nga Assessment Division milampurnas sa Pimentel-Limasawa Brokerage, 95-78 ubos sa pagtimon sa ilang division chief nga si coach Rady Abarintos atol sa pagpadayon kaniadtong Martes sa 14th Collector’s Cup basketball tournament 35 years under didto sa Vicente Sotto Memorial gym sa barangay Punta Princesa, ning dakbayan.

Sa laing mga duwa, ang MJDL Brokers midaug batok sa Enforcement Security Service (ESS) X-Ray Division sa iskor, 65-44 samtang ang Port Operations Division misumbalik dayon human mahiagum og pilde sa ilang debut ug mikulit og 80-63 nga kadaugan batok sa Chamber of Customs Brokers, Inc. (CCBI) alang sa 35 years above category.

Mainitong gisugat sa Assessment ang Pimentel ubos sa ilang coach nga si kanhi-PBA player Larry Villanil pinaagi sa pagpabuhagay og 13-0 run sa first period ug kanunay na silang naglabaw og double figure sa halftime.

Ang Pimentel Brokers mihinay-hinay og kamang sa third period ug nakahigayon gyud sa pagsikit sa iskor, 51-53 apan mitubag sab dayon ang Assessment pinaagi sa rally nga gipasiugdahan ni Daniel Enriquez ug wala na sila mahulga hangtod na sa paghuni sa buzzer.

“A win is a win be it a close game or not.The most important is that Pimentel is mentored by an ex-pro (Villanil) ,” matod pa ni Abarintos.

Ang iyang secret weapon nga si Johnrey Areglo wala moduwa atol sa ilang kadaugan tungod kay aduna siya’y piang.

Si Adrian Laborte maoy nangu sa Assesment pinaagi sa pagburak ug 25 puntos samtang si Viking Rollon ug Enriquez mitampo og 16 ug 13 puntos.

Ang Pimentel Brokers gipalig-onan ni Villanil pinaagi ni Lapulapu Chiefs topgunner Adonis Morata sa Inter-City League aron pangulohan ang iyang team sa iyang 18 puntos. Gani, daghan pa unta siyag mahakot apan napugngan siya sa mas abtik nga depensa ni Dondon Cadungog nga misakripisyo sa iyang puntos.

Wala na mangandoy pa nga mosalida si Abarintos kay iyang natugkad ang tinuod niyang hilig ug way lain mao ang coaching. Dili siya basta-basta tawgon og coach Rady sa ilang dapit sa Punta Princesa nga walay kahulugan ug siya sab ang nag-inusarang sponsor sa 1st Coach Rady Cup basketball tournament didto sa barangay Punta Princesa nga bag-o lang natapos.

Sa sayo pa, si Inting Bacalla maoy nangu sa MJDL pinaagi sa iyang 16 puntos ug siya lang ang nakahimo’g double figures tali sa duha ka teams nga nagsangka.

Puntos kada usa:

First Game: (35 years above)

MJDL (65)— Bacalla 16, Nacario 9, Medalle 8, Jordan 8, Nioda 6, Suico 6, Labayan 4, Baillo 4, Dacumos 2, Lopez 2, Martinez 1

ESS (44)— Sicat 8, Monteño 8, Cabahug 7, Cabrera 5, Mabalo 5, De Gracia 3, Mongaya 2, Velez 2, Lozano 2

Second Game: (35 years below)

Assessment (95)- Laborte 25, Rollon 16, Enriquez 13, Francia 10, Cadungog 8, Cal 6, Biñar 5, Ocon 4, Perez 2, Navaja 2

Pimentel-Limasawa (78)— Morata 18, Moral 13, Bensi 8, Palero 7, Baguio 6, Largosa 6, Arong 5, Villarosa 5, Villa 3, Rosel 3, Ebo 3, Cabase 2. - Gabby G. Malagar (BANAT NEWS)