Lapu-Lapu ug Mandaue nag-una tagsa-tagsa ka bracket sa GUV Cup

CEBU - Ang defending champion Lapu-Lapu ug Mandaue maoy nag-una sa ilang tagsa-tagsa ka brackets alang sa City cluster semifinal round sa 4th Governor Gwen Garcia Unity Volleyball (GUV) Cup for Women niadtong Domingo didto sa Celestino Martinez Sr. Sports and Recreational Complex sa Bogo.

Ang Lapu-Lapu makigsangka sa Toledo, samtang ang Mandaue moharong sa Talisay sa crossover semifinals nga gikatakda sa Disyembre 19 diha sa Cebu International Convention Center (CICC) sa Mandaue City.

Giharos sa Lapu-Lapu ang tulo ka duwa sa eliminasyon sa bracket-A, apan miagi pa kini og makutas nga duwa sa wala pa nila pildiha ang Talisay City sud sa tulo ka sets, 25-18, 17-25, 26-24.

Pabor unta nga modaog ang Talisay dihang nilabaw kini, 22-18 nga bentaha sa deciding set. Apan ang RP team member nga si Jusabelle Brillo sa Lapu-Lapu milusad og 5-0 run aron pagtabla, 22-all.

Molabaw na unta ang Lapu-Lapu, apan nasipyat ang ikaunom ug mahinungdanong serbisyo ni Brillo. Gibawi hinuon sa Lapu-Lapu ang ilang sayop hangtod nga ilang nakuha ang kadaugan.

Sukwahi sa Mandaue, kinsa yano kaayong mimakmak sa Toledo, 25-14, 25-17.

Sa dili pa ang city cluster semifinals, ang top 12 qualifiers sa municipal cluster ning maong torneyo nga gipasiugdahan sa Cebu Volleyball Association (CEVA) magsangka sa quarterfinal round karong Disyembre 15-17 diha gihapon sa CICC.

Ang semifinals himuon sa Disyembre 18-19, samtang ang finals sa duha ka clusters tigian sa Disyembre 20. (BANAT NEWS)