Gray 3-0 na sa BAR

Ang Gray team ni Allan Lim naka-ipsot batok sa Blue team sa iskor, 96-94 kaniadtong Huwebes atol sa nagpadayon nga Basketball Association of Ramos (BAR) 2nd Conference didto sa Cogon Ramos gym.

Ang maong kulba-hinam nga kadaugan naghatod sa Gray ngadto sa ilang ikatulo nga sagunson nga kadaugan samtang ang Blue nahagsa ngadto sa 1-2 nga baraha.Nagtabla na sa liderato ang Gray ug ang Red Bull.

Tungod sa kasikit sa duwa, nagsige og puli-puli og labaw ang duha ka teams ug makadaghan sab nagtabla apan wala kahubsi sa momentum ang Gray ug naka-ipsot gyud didto na sa pipila na lang ka segundo sa wala pa mahuman ang duwa.

Nagtabla pa sa 48-all sa halftime ug kataposan higayon nga nakalabaw ang Blue sa naghinapos na ang first period, 31-18.

Didto na sa second half naninguha og maayo ang Gray ug tungod sa ilang pagpanikay-sikay, naka-ipsot gyud sila ilabi na kay nanginit og maayo sila si Nilo Dandan, Lito Navarro ug si Lim mismo, ang tag-iya sa team.

Dihang misuway na sab sa pag-ilog sa labaw, mitabang og pakgang sila si Rey Jumamel, Yokyok Alesna ug Roy Pilapil pinaagi sab pag-iskor og krusyal baskets sa fourth period.

Si Dandan maoy nangu sa Gray sa iyang 20 puntos samtang si Jimbo Noel maoy nangu sa Blue sa iyang 24 puntos.