Quilote  misakmit sa titulo

Gipakugang ni Yoko Quilote ang  kadaghanan  human niya madaog ang singles title sa  Mayor Tomas Osmeña and Councilors Dart Cup 2008 sa miaging gabii didto sa Baseline Sports and Recreation Center.

Gipukan ni Quilote ang beteranong si William Encorporado  aron pagsakmit sa titulo sa  duha ka buwan  nga kompetisyon.

Laing  beteranong darter nga si Dick-Dick Ramirez nalagpot  sa ikatulo nga dapit, samtang si Angelito Badayos mitapos sa ikaupat nga dapit.

Mi-okupar sa ikalima nga dapit mao si Dino Bacayo, mitapos sa ikaunom nga dapit  si Jerous Ponce. Ang ikapito ug ikawalo nga dapit naangkon nilang Wyno Ugang ug Dodong Lumantao.

Sa laing bahin, sila si Ugang ug Bethoven ‘Boy’ Campugan maoy milangkat sa classified doubles title.

Sila si Ugang ug Campugan mipukan nilang Ramirez ug Stevan Montenegro sa finals. Sila si Allan Veloso ug Odong Pamatian mitapos sa ikatulo ug gisundan nilang Encorporado ug Larry Tan alang sa ikaupat.

Sa four-man competition, ang team ni Jerous Ponce maoy midaog sa titulo human gipilde ang twice-to-beat squad ni Jerome Perales.

Kauban ni Ponce sa team mao sila si Larry Garrido, Dino Bacayo ug Bluboy Manulas.

Ang top performers ning maong kompetisyon nga gipasiugdahan sa City Hall Employees’ Darts Association (CHEDA) pasidunggan karong Marso 1 diha sa Baseline  Restaurant.