Heat sinilaban Rockets para sa ika-5 dikit

MIAMI — Naglista si Giannis Antetokounmpo ng 20 points at 13 rebounds, habang umiskor sina Andrew Wiggins at Klay Thompson ng tig-17 markers sa 128-110 pagpapabagsak ng Heat sa Houston Rockets.
Kumonekta si Thompson ng limang three-point shots para sa kanyang pang-2,952 triples at 21 tres ang agwat kay Ray Allen (2,973) para sa third spot sa all-time 3-point list.
Ito ang pang-limang sunod na arangkada ng Miami (8-6).
May 16 points din si Bobby Portis Jr. para sa host team na naglaro na wala si Bam Adebayo (right hip tightness) sa ikalawang sunod na pagkakataon.
Bumira si Alperen Sengun ng 23 points para sa Houston (11-4) na nagwakas ang four-game winning streak.
Nagdagdag si Kevin Durant ng 22 points para sa kanyang kabuuang 32,917 points at 83 points ang layo para makumpleto ang 33,000-point milestone.
Tanging sina LeBron James, Kareem Abdul-Jabbar, Karl Malone at Kobe Bryant ang mga miyembro ng nasabing elite club.
Kaagad kinuha ng Heat ang 29-15 abante sa first period at hindi na hinayaan ang Rockets na makalapit.
Sa iba pang laro, sinapawan ng Orlando Magic ang Boston Celtics, 115-105; tinusok ng Cleveland Cavaliers ang Chicago Bulls, 126-115; wagi ang Memphis Grizzlies sa Washington Wizards, 136-120; binutas ng Philadelphia 76ers ang Brooklyn Nets, 135-123; tinalo ng Minnesota Timberwolves ang Portland Trail Blazers, 106-98; dinaig ng New Orleans Pelicans ang Golden State Warriors, 115-94; at sinunog ng Phoenix Suns ang Denver Nuggets, 117-105.
- Latest


















