Asi is PBA MVP 2003

Pagkatapos mapag-kampeon ang Talk N Text sa All-Filipino Cup at tanghaling Best Player of the Conference, natuwa ang Fil-Tongan na si Asi Taulava.

Ngunit kagabi, lubos ang kanyang kasiyahan nang tanghalin siyang Most Valuable Player para sa 2003 season ng Philippine Basketball Association sa Leo Awards, ang star studded PBA annual awards na ginanap sa Music Museum kagabi sa Greenhills, San Juan.

Tinalo ni Taulava para sa naturang karangalan si Rudy Hatfield na napili namang Best Player of the Conference ng katatapos lamang na Reinforced Conference na pinagharian ng kanyang team na Coca-Cola.

Napili namang Rookie of the Year ang isa pang Phone Pal na si Jimmy Alapag.

Pinangunahan ni Taulava ang listahan ng Mythical team kung saan kasama nito si Hatfield bukod pa kina Tigers Jeffrey Cariaso at Dennis Espino ng Sta. Lucia Realty.

Bumubuo naman ng Mythical second team sina Marlou Aquino ng Sta. Lucia, John Arigo at Don Carlos Allado ng Alaska Aces, Harvey Carey ng Talk ‘N Text at Johnny Abarrientos ng Coca-Cola.

Ang isa pang naging MVP contender na si Rafi Reavis ng Tigers ang tinanghal namang Most Improve Player habang ang Sportsmanship award ay ibinigay naman kay Patrick Fran ng Phone Pals.

Kabilang sa All-Defensive Team sina Taulava, Hatfield, Fran at Aquino kasama si Willie Miller ng Red Bull.