Montana nanalo sa Casino

CEBU CITY – Nakopo ng Montana Pawnshop ang solong liderato matapos na iposte ang 67-62 panalo kontra sa Casino Rubbing Alcohol, ngunit tinabunan ito ng kalungkutan para sa PBL matapos na lumasap ang Regent-Shark at Blu All-Purpose ng magkahiwalay na talo kahapon sa pagpapatuloy ng PBL-CBF Dual Meet II sa University of San Carlos Gym dito.

Humakot si Jenkins Mesina ng 16 puntos, habang nagdagdag naman sina Sunday Salvacion at Jon Dan Salvador ng 12 at 11 puntos, ayon sa pagkakasunod upang irehistro ng Jewelers ang ikalawang sunod na tagumpay.

Ngunit hindi naging maganda ang kapalaran ng Regent-Shark at Blu All-Purpose matapos na yumukod sa kani-kanilang kalaban mula sa Cebu teams.

Isang undergoal stab ni Alfie Grijaldo ang isinalpak nito sa huling segundo ng labanan na siyang nagdala sa GMC-Tortillos sa 68-66 panalo kontra sa Regent-Shark, habang pinayukod naman ng Skygo Riders ang Blu All-Purpose, 77-70.