Pinakamabisang paraan para gumanda

Ayon sa Doktora Katty Go, isang magaling na dermatologist, mayroon mabisang paraan para malunasan ang mga sakit sa balat. Ayon sa pagsusuri, ang taong masaya o masiyahin ay mas hindi nagkakasakit sa balat.

Ang pagiging masaya ay dagdag pa sa pangkaraniwang payo para gumanda tulad ng pag-iwas sa araw, paggamit ng sunscreen, pagkain ng prutas at gulay at pag-inom ng 8 basong tubig bawat araw.

Be happy. Maraming sakit ang malulunasan ng pagi­ging masaya at pagbawas sa stress:

1. Eczema – Ang eczema ay isang pamamaga sa balat na lumalala kapag kinakamot ito. Kapag inis tayo at hindi natin ito nailalabas, puwede ito lumabas bilang eczema sa katawan. Kapag masaya ka, mas mabilis gumaling ang eczema.

2. Psoriasis – Lumalabas ang pantal ng psoriasis kapag nagalit ang pasyente. Napatunayan sa pagsusuri na ang galit ay nag-trigger ng “flare-up” ng psoriasis dahil humihina ang immune system.

3. Kulubot sa mukha – Kapag galit o inis tayo, lalong kukulubot ang ating mukha. Lalalim ang kulubot sa noo, pagitan ng kilay at tabi ng bibig.

4. Maitim na balat – Ang dahilan ng pangingitim ng balat ay ang pagkuskos at pagkamot. Kapat emosyonal tayo, hindi natin namamalayan na kinakamot na natin ang ating balat. Dahil dito, magsusugat ito at mangingitim.

5. Tigyawat (Pimples) – Ang tigyawat at lumalala kapag stressed o puyat. Kapag masaya tayo, mas mababawasan din ang tigyawat.

6. Balakubak (Dandruff) – Ang sanhi ng balakubak ay isang fungus, na tinatawag na “pityrosporum ovale”. Ang balakubak ay mas kumakapalat nangangati kapag stressed ang tao.

Tandaan: Kapag naiinis ka sa iyong sakit sa balat. Lalong lalala ang iyong sakit. Kahit ano pa ang ipahid mo sa iyong balat, kapag mainit ang iyong ulo, ay hindi pa rin gagaling iyan. Kaya “be happy” na para tuluyang gumanda ang balat.