Pagkaong makasamot sa panakit (2)

*Monosodium glutamate (MSG) — Sagad ang uban sa ilang niluto, wala gyu’y lami, kon dili butangan og MSG, o betsin. Gikan kini sa asin nga giproseso ‘chemically’ ug nahimong sodium. Duna sa’y asin nga tam-is, nga ‘sodium cyclamate’, nga nagdala sa lainlaing mga brand sa sweetener. Mopagana kini sa enerhiya apan hasta sab ang kanser, inanay moaktibo sa atong lawas.

* Alcohol — Mao kini ang una nga mopakurat sa espiritu ang alcohol, mora’g moigwad nga magsalimoang ang kaunoran ug kaugatan, nga napugwat sa kahiamgo. Maayo man kini nga pampalagsik sa galamhan ug kaisipan ug sa kasingkasing mopalig-on.

Apan kon magpatuyang niini sa pag-inom, makayabag sab ni nga mawala ang kabuot. Motuskig ang kaugatan ug kaunoran nga mamanhod, dayon moandar na ang panakit sa ulo nga mokuyamang ngadto sa ubang parte sa lawas. Labi na’g giartraytis ka na, mograbe nga ingon sa mainutil ka sa makakimay nga panakit.

* Refined carbohydrates — Mga produkto kini nga hinimo gikan sa puti nga giproseso’ng harina, sama sa pan, crackers, cereals, puti nga patatas ug puti nga bugas (white rice). Tanan kini taas og GI (glycemic index) nga maoy hinungdan sa pagtambok sa lawas ug ubang laygay nga panakit (chronic pain).

* Redmeats & Processed meats — Mga pula nga karne ug ang mga giprosesong pulang karne sama sa ham, sausage, hotdogs, ug uban pa, pulos kini nagbaton og ‘purines’ ug ‘nitrate’ nga kemikals, nga mopasamot sa panakit ug sa implamasyon. Sa mga pagtuon, gawas sa implamasyon, nagsilbi usab kini nga abuno para moaktibo sa pagtubo ang selyula nga kanser.

Busa sa mga duna na’y panakit sa lutahan, mas maayong likayan una kining mao nga mga pagkaon aron kini dili mosamot nga mag-antus ka og pamuypoy sa panakit.