Sakit ni Romualdez

Alas-9 sa buntag niadtong Lunes, Septiyembre 7, tulo ka oras sa wala pa ipasaka sa Ombudsman ang iyang kasong plunder sa Sandiganbayan, si kanhi House Speaker Martin Romualdez nanawag sa iyang doktor aron sa pagreklamo nga nagsakit ang iyang dughan.

Ang doktor, nga nipasidaan sa mga mahistrado sa Sandiganbayan nga labihan katandugon sa kahimtang ni Romualdez ug mas mameligro pa gyod kon ibalhog sa prisohan, walay gihimo. Gipalabay ang pito ka oras una gi-admit sa ospital ang pasyente. Kapin sa oras sa wala pa i-serve sa kapolisan ang arrest warrant.

* * *

Ang admitting physician sa Cardinal Santos Medical Center niingon nga wala mo-agi sa emergency room si Romualdez. Wala siya pasudla sa hospital room ni Romualdez. Igo lang gisugo sa paghimo og medical abstract bisan wala aktuwal nga makasusi sa kahimtang sa pasyente.

Pag-abot sa mga polis, gipasidan-an sila nga dili pabangunon si Romualdez. Dili matangtang ang tubo sa iyang bukton. Maong gihaklapan na lang og orange shirt og placard nga gimarkahan og plunder para sa iyang mug shot. Ug gibulit og tinta ang mga tudlo para sa finger prints.

* * *

Sa unang adlaw sa hearing sa petisyon ni Romualdez para sa hospital arrest, niapil na og dupa ang mga doktor sa Philippine National Police General Hospital (PNP-GH). Matod nila mameligro si Romualdez kon dad-on sa Sandiganbayan.

Sa ikaduhang adlaw sa hearing, gipatung-patong sa mga doktor ni Romualdez ang tanang sakit, apil nang depression ug kalisod sa pagkatulog, aron pagkumbinser sa mga huwes nga papahuwayon sa ospital si Romualdez og pila ka semana sa dili pa prisuhon.

* * *

Maayo na lang nga ang third division sa Sandiganbayan na-leksiyon sa palusot ni Senador Rodante Marcoleta. Kinsa gideklarar sa mga doktor sa PNP-GH nga kritikal. Human gisugo sa korte, nitaho ang mga espesyalista sa Philippine General Hospital (PGH) nga dili himatyon si Marcoleta. Maong napriso na.

Mahingpit ang pakisusi sa PGH sa panglawas ni Romualdez karong weekend. Ma-sumiter ang ilang findings sa Sandiganbayan unya sa Lunes. Kon samang Marcoleta makaplagan si Romualdez nga nagpaluya-luya lang, hinaot nga gawas nga ibalhog sa Payatas sa labing daling panahon kasohan sab ang tanang kakonsabong mga doktor apil nang taga PNP-GH.

* * *

[email protected]