Ang ulilang puso

Ngayong Month of Love lungkot at pighati

ang sa bawat oras ay aking kalimpi;

Wala ang mahal kong sa bawat sandali --

noon ay kasama sa lahat nang gawi!

Batid ko na ring mahirap umibig

sa isang nilakhang kapilas ng dibdib;

Sa bawat sandali napapanaginip

ang kanyang pagtungo sa ibang daigdig!

Tulad nang nangyari sa buhay ko ngayon

hinahanap-hanap magandang panahon;

Sa ilog at batis doo’y naglulunoy

sa mga nasapit na bayan at nayon!

Sa mabangong simoy at dampi ng hangin

maraming gunita ang laging kapiling;

Sa maraming pook na aming narating

Masayang-masaya ang puso’t damdamin!

Kaya ang gunita ay nagpapatuloy

hanggang sa masapit ang bawa’t linggatong;

Gunita na lamang siyang dumadaloy

kaya ang pag-ibig laging sumisibol!

Pag-ibig ko ngayo’y aking iaalay

sa magandang mukhang Inang Pilipinas!

Pagtaas at pagbaba ng ating watawat-

siya’y ilalaban hanggang sa mautas!

At kung kailangang buhay ko’y ihandog

sa bagong digmaan hindi ako takot;

Pagka’t ikaw mahal ang dito’y kasangkot –

inspirasyon kita hanggang sa malagot!