Gitaktak nga guwardiya

Dear Atty. Divine,

Usa ako ka security guard ug mag 9 years nako sa among agency. Nasakpan ko sa inspector nga natulog sa akong post mga 3 am last November 15, 2015 ug giisyohan ko og memo for sleeping on post attorney. Gipa-explain ko within 24 hours, then after 3 days, naka-receive ko og memo for suspension for 15 days ug nasuspenso gyud ko. After 15 days mi-report ko sa among office para magkuha unta ko og back to work, but gitangtang na man diay ko sa among agency didto sa company nga didto ko ma-assign. Unsay akong buhaton kay dunay nag-ingon nga dili kuno husto ang akong pagka suspenso kay naa pa kuno’y 1st ,2nd ug 3rd offense. Pwede ba ang usa ka agency motangtang nimo sa company nga didto ka gi-assign bisan ang manager wa nagpailis nimo? Di ba illegal dismissal ang pagtangtang nako attorney? Mag one month nako gikan sa pagtangtang nila ug until now wa ko hatagi og laing pwesto. Unta imo ko nga matabangan niining akong problema. Taga Oroquieta diay ko attorney, sa Villafloor. —  Hanz

Dear Hanz,

Ang imong agency adunay katungod nga mopapha og trabahante kun adunay lig-ong basehan, ilabi na kun nakahimo og kasaypanan ang kawani. Apan kining tanan ipaagi og due process o paagi nga diin mahatagan og higayon ang empleyado sa pagtubag ug pagpasabot sa iyang kasaypanan nga nahimo. Sa imo nga kaso, kun gitangtang ka nga wa pahibaw-a, so wa ka mahatagi og due process ug wa masunod sa kompaniya ang mga pamaagi sa pagtangtang og kawani. Kinahanglan ang kompaniya unta mohatag og notisya sa empleyado 30 ka adlaw sa dili pa ang hingpit nga pagtangtang kaniya. Ang maayo nimo nga buhaton karon mao ang pagpasaka og reklamo batok sa imong agency ngadto sa NLRC for Illegal Dismissal, mahimo ka sab nga mo-demand og 13thmonth pay, back wages ug magpabalik ka sa trabaho kun gusto ka pa nga motrabaho nila or magpabayad ka og separation pay kun di na ka gusto nga motrabaho sa maong agency. Duna ra kay form nga i-fill-up sa NLRC alang sa imong pormal nga pagpasaka og reklamo. Thanks and Happy New Year! — Atty. Divine