Cebuanos sa Zambo

Gibalita nga nakahunahuna si Mayor Mike Rama nga mohatag og hinabang sa mga sibilyan nga nabiktima sa kagubot didto sa Zamboanga City.

“Maayong desisyon kini ni Mayor Mike,” matud pa ni Josephus Hermoso Sr., Sugbuanon nga dugay nang nanimuyo sa Zamboanga.

Ania karon sa Sugbu si Mr. Hermoso diin nagpatambal sa iyang asawa sa usa ka pribadong ospital.

* * *

Matud ni Mr. Hermoso naay daghang mga Sugbuanon sa Zamboanga ug ang uban kanila mga biktima sab sa krisis sa mga rebeldeng Muslim.

Daghan kuno siyang nailhang mga Sugbuanon kang kansang mga panimalay nasunog ug anaa na karon nanimuyo sa sports center.

Duha ka hamtong anak ni Mr. Hermoso nanga-abo ang panimalay sa Rio Hondo.

* * *

“Maayo man unta ang maong pagpuyo sa Santa Barbara. Malinawon. Higala namo ang tanan -- Kristiyano ug Muslim. Naguba ang among kinabuhi tungod sa nahitabong gubat,” suma pa niya.

Matud pa ni Mr. Hermoso, naay mga Cebuano school teachers sa Zamboanga, mga tag-iya’g mga  tindahan sa pagkaon, ug mga property owners kinsa pulos nabiktima sa gubat.

* * *

Suma pang Mr. Hermoso ang mga Climaco nga political leaders sa Zamboanga City adunay gamot kon roots sa Sugbu.

“Maayo gayud nga desisyon ni Mayor Rama nga motabang sa mga sibilyan nga nabiktima sa kagubot sa Zamboanga,” matud pa niya.

* * *

TRIVIA. Maayong adlaw sa atong mga higala diha sa Central Post Office ug mga dapit palibot niini. Daghang salamat sa inyong padayong suporta sa Banat News.