EDITORYAL - Drag racing nisiaw

Sa nangaging mga adlaw, daghang mga nanggawas nga post sa social media bahin aning mga maglumba-lumba diha sa karsada dinhi sa Sugbu.

Ilegal kini ug peligro kaayo para sa publiko ilabi na sa mismong mga drayber nga naglumba-lumba kay ang dalan nga ilang gilumbaan, pangpublikong karsada.

Sagad nila kini buhaton sa mga dalan nga mingaw ug panagsa nalang agian og mga sakyanan. Sagad kini mahitabo ini og lawom na ang kagabhion hangtud kadlawon.

Duna say mga report nga naay mag-drag race nga mga motorsiklo diha sa North Reclamation Area sa habig sa Mandaue City ini og tungang gabii.

Naa say report nga susamang lumba-lumba diha sa Cansaga Bridge sa utlanan sa Mandaue City ug Consolacion ug sa may lungsod sa Cordova ug bisan sa Cebu South Coastal Road sa habig sa Cebu City ug sa Talisay City.

Kasagaran kung asa dunay diretso ug taas-taas nga karsada anha sila maglumbaanay. Ang uban, magpustahanay gyud og kwarta o ba kaha ang mismo nilang mga motor maoy isugal.

Apan wala nila tan-awa nga gawas sa kwarta o butang nga ilang gipusta, apil sa ilang gisugal ang ilang kinabuhi ug ang kinabuhi sa uban nga posibleng maamong tungod sa ilang pagka-garaon.

Kinahanglang masanta ni sila sa mga otoridad. Apan unsaon man pagsanta kun walay grupo sa mga polis o nga traffic enforcers nga nakatutok pagpangita ug pag-ila kung kinsa ang mga nag-organisar niining illegal nga drag race.

Ang aktibong kampanya pagpangita aning mga promotor aning illegal nga lumba-lumba sa publikong mga dalan mao ray epektibong paagi aron mahunong kini kay si bisan kinsa puydeng maamong aning ilang binuhatan.

Sa miaging gabii, duna gyuy tawong nakalas human siya nadasmagan og awto nga nakiglumbaanay sa laing awto diha sa Barangay Kasambagan sa Cebu City.