Amici Curaie

Karong Septiyembre 16, adlaw nga Miyerkules, ang mga Senador maglantugi kon pila gyud ang gidaghanon sa mga Senator-Judges nga mobotar aron nga makonbikto si Vice President Sara Duterte.

Tungod niini, nahukman sa mga senador nga mangimbitar sila og mga “friends of courts” nga makatabang kanila sa pagdiskuter kon pila gyud ang tukma nga threshold nga makapakonbikto, ug makapaabswelto ni Sara.

Karon gud, 20 na lang ka senador ang makatambong kay ang upat kanila dunay kakulian. Si Senador Ronald Dela Rosa nagtagotago tungod sa warrant niya sa International Criminal Court; si Jinggoy Estrada napriso tungod sa kalambigitan niya sa flood control anomaly.

Si Senador Rodante Marcoleta napriso tungod sa pagdawat og P75 million nga donation alang sa iyang kandidatora unya wa niya iapil sa iyang Statements of Contribution and Expenses, ug si Senador Loren Legarda tua pa sa abroad nagpatambang.

Gusto karon sa ubang senador nga kaalyado sa administrasyon nga kay 20 na man lang ka Senador ang mahimong makatambong sa Impeachment Trial, pakubsan sab ang threshold sa makabotar aron mohukom kon konbiktohon ba si Sara, o dili.

Ang atong Konstitusyon naglatid nga hukman ang akusado atol sa Impeachment Trial sa “2/3 sa tanang sakop sa Senado.” Wa man ibutang nga hukman ang akusado sa 2/3 sa mga senador nga manambong sa Impeachment Trial.

Gilantaw karon sa mga senador nga karong Septiyembre 23, hukman na nila kon konbiktohon ba, o i-abswelto si Sara kay napaminaw na man nila ang mga pasangil batok kaniya.

Hinoon nahibaw-an na man nato nga ang tinguha gyud sa mga senador nga wa makagusto ni Sara mao nga dili gyud siya makalansar pagka presidente sa umaabot nga presidential elections sa 2028.

Mao nga nindot gyud nga mangimbitar ang mga Senador og mga retired justices sa Supreme Court, ingon man mga legal experts, apil kadtong migama kaniadto sa atong Konstitusyon aron nga mogiya kini kon unsay tukmang pagabuhaton.

Tingali pinaagi sa ilang mga ideya ug mga sugyot, mahimong magiyahan ang atong mga Senador kon unsay tukma nila nga himoon tungod kay dili man gyud kompleto nga 24 ang atong mga senador.

Nindot usab ang gisugyot nga itugyan ang isyu sa Supreme Court ug sabotan sa mga senador nga mentras wa pay hukom ang labaw’ng hukmanan, dili usa sila mohimo og voting.