Kamapaubsanon ni Davide
Sukad sa iyang pag-asumir sa katungdanan niadtong Hunyo 30 sa udto, kanunay’ng sayo si Gobernador Hilario Davide III nga mo-report sa iyang buhatan sa Kapitolyo.
Gani sa unang adlaw niya sa trabaho, Hulyo 1, mas sayo pa siyang niabot kay sa ubang opisyal sa lalawigan. Mao man gani nga usa sa una niyang mando mao nga ilang himuon ang flag ceremony sa Kapitolyo nga alas 7:30 inay sa naandang alas 8:00 aron pagsiguro nga sa oras sa pagsugod sa trabaho andam na silang moatubang sa pagserbisyo sa publiko.
Niadtong Meyerkules sa buntag, sama sa nangagi nga mga buntag, sayong niabot si Davide sa Kapitolyo. Siguro gibati og kalaay sa iyang opisina, nahukman niini nga moduaw sa iyang higala ug kababayan nga si Judge Bienvenido Saniel, Jr. didto sa Palace of Justice aron dapiton og kape. Alas 7:45 sa buntag dihang niabot si Davide sa ganghaan sa korte, niadtong tungora mao pa say pagpangabot sa ubang kawani sa korte. Ang gobernador nangutana sa gwardiya nga si Ronald Jayme sa Eagle Matrix Agency kun niabot na ba si Saniel.
Apan gibalibaran siya sa gwardiya nga dili pa mamahimong mosulod sa Palace of Justice tungod kay wala pay office hours. Si Jayme uban sa laing gwardiya nga si Rex Amay pulos wala makaila sa gobernador.
Apan inay mamugos pagsulod o ba kaha magpaila sa iyang kaugalingon, mitalikod nga wala gani bisan dyutay na lang bagulbol nga gibuhian batok sa gwardiya si Davide.
Inay moinum og kape uban sa iyang amigong huwis, milahos siya sa canteen sa Kapitolyo ug mikaon og pamahaw. Awahi nang nasayod ang duha ka gwardiya nga ang ilang gibalibaran nga makasulod sa Palace of Justice mao diay ang gobernador sa Sugbo.
Bisan awahi na, apan gipaabot sa duha ka gwardiya ang ilang pagpangayo og pasaylo.
Mamahimong dili husto sa panan-aw sa uban ang gihimo sa duha ka gwardiya. Apan alang nako igo lang silang naghimo sa ilang trabaho. Dili sab nila sayop kun wala gyud silang makaila sa gobernador.
Apan labaw sa tanan, nahurot akong bilib ni Davide. Iyang gipakita ang pagkamapainubsanon. Mamahimo man gyud untang magpaila siya sa iyang kaugalingon ug magpahatud sa gwardiya didto sa sala ni Saniel. Apan wala kini niya buhata. Talagsaon ang kinaiya nga ingon niini sa usa ka gamhanang opisyal. Akong pagsaludo sa gobernador!
* * *
Labihang pangugat ni Konsehal Mary Ann delos Santos nga wala siya hatagi og komitiba. Nibarog gyud siya sa hawanan sa konseho aron paghimo og privilege speech pagsaway sa mayoriya sa mga sakop sa konseho tungod sa ilang gihimo.
Matud ni delos Santos nga namolitika og maayo ang mga kaalyado sa Bando Osmeña Pundok Kauswagan. Apan luyo sa iyang pagpangugat, daw sa gitamparos siya og bali-bali dihang mismo si Mayor Michael Rama nga iyang kaalyado miangkon nga igo lang gisubay sa mayoriya ang house rules sa konseho.
Sigun diay sa house rules ang minority leader ug ang assistant niini dili gyud mamahimong hatagan og komitiba. Maayong pagkasupalpal ni delos Santos. Maayo tingali nga sa sunod higayon, sa dili pa siya mopaghot, iya una’ng sigurohon nga nasubay sa proseso ang iyang gustong pangayoon.
* * *
- Latest
