SSS ug CITOM

Angay nato nga daygon ang kadagkoan sa Social Security System (SSS) tungod sa paghatag nila og higayon nga maka-avail og educational assistance loan ang ilang mga miyembro sa tumong nga makapadayon kini pagtungha sa koleheyo ang ilang mga anak.

Daghan pa kaayo ang wala masayud niining maong benepisyo nga gitanyag sa SSS mao nga isip pagtabang kanila, akong gituyo sa paghisgut kining maong isyu dinhi sa atong lindog.

Duna ko’y kopya sa Circular No. 2013-004 nga giisyu ni SSS President ug Chief Executive Officer Emilio S. De Quiros Jr. kaniadtong Abril 12, 2003 ug natan-aw nako nga nalooy gayud ang kadagkoan sa SSS sa ilang mga miyembro.

Sa “amended circular” nga bag-ong giluwatan ni De Quiros gihimo sa SSS nga sayon ang pag-avail sa educational assistance loan program.

Sa una dili ka maka-avail og educational assistance loan kun ang monthly SSS contribution wala makaabot og 36, apan karon gihimo na lang 12. Dili ba nindot kaayo?

Labi na nga ang pagbayad sa loan adto na himoon kapin sa usa ka tuig human mogradwar ang tinun-an.  Kamo diha, kun gusto mo nga mo-avail sa loan assistance program, adto lang sa SSS.

* * *

Nalipay ko pagkakita nga mora’g gipanipsan na og gamay ang mga tindahan nga anaa diha sa aseras sa dalan Legaspi, tupad sa barangay hall sa Sto. Niño. 

Apan mao lagi, makaingon ta nga magkinahanglan pa nga isig-isigon nato ang mga hingtungdang kawani sa City Hall nga gitugyanan niining mao nga tahas usa motrabaho.

Ako nga maglakaw-lakaw diha sa lainlaing dapit, daghan kaayo ko nga makita nga angay’ng usbonon ug himoan og kausaban. 

Sama ana nga pagdili sa CITOM nga ang mga sakyanan nga gikan sa Beverly Hills o Sudlon dili tugotan nga maka-left turn paingon sa JY Rotunda gikan sa alas 6 ngadto sa alas 9 sa buntag.

Maayo man ang maong paagi sa CITOM kay gituyo man kana aron dili kaayo mabalda ang moagi nga mga sakyanan diha sa Gorordo Avenue, apan ang nakaapan kay asa man nila palikoa ang mga sakyanan?

Duna ba’y “U-turn slot” nga gibutang sila? Kay wala may “U-Turn slot” sila nga gipahimutang, adto ra sa unahan tungod sa Temple mobalik ang mga sakyanan.

Ang taliwala sa karsada diha adunay “imaginary islands” kanang yellow nga pintal nga anaa taliwala sa karsada. Gidili ang pagbalik diha sa maong lugar apan unsaon man, asa man nimo ipa-U-turn ang mga sakyanan?

Palihog mga sakop sa CITOM Board, diskutiha tawon ninyo kini og maayo sa inyong miting.