Maikugon nga kapolisan

Dihang nakadawat sa alarma nga namusil na sab si Joavan Fernandez niadtong Domingo sa kadlawon, si Talisay City Police Chief Eddie Recamara niangkon nga gisugo dayon niyang iyang mga sakop sa pagsikop sa sinagop ni Talisay City Mayor Soc Fernandez.

Apan ang iyang desk officer nga si Police Officer 2 Amelito Hornales way sugo nga nadawat gikan ni Recamara. Gani, sa among pakighinabi niya 30 ka oras human sa alarma, way kauban niyang polis nga nakapahibawo sa labing uwahing pasangil batok ni Joavan. Ang unang nakapahibawo niya sa insidente mao nang sakop sa media nga namalihug niya pagbasa sa blotter.

* * *

Si Recamara nipasabot nga wa niya mapahibawo si Hornales sa manhunt batok ni Joavan kay way cellular phone ang desk officer. O, kun duna man, wa siya tug-ani sa numero mao nga wa maapil sa iyang text blast.

Kun seryuso si Recamara pagpadakop ni Joavan, giseguro unta niya pagpahibawo si Hornales. Nga, isip desk officer, maoy nagduma sa presinto ug sa deployment sa mga polis nga nag-duty atol sa shift. Unsaon man pagpatuman ang sugo pagpangita ug pagdakop ni Joavan nga wa may bisan usa sa gisundang shift ni Hornales ang nakatug-an niya sa insidente. Wa katabang ang katapolan ni Hornales pagbasa sa blotter sa iyang pagbanos.

* * *

Dugang timaan nga pagarpar ra ang gideklarar ni Recamara nga manhunt batok ni Joavan:

•  Wa sila’y nahipos nga dugang kasayuran sa insidente gawas sa mga detalye nga gihatag sa representante sa gasoline station nga nagpa-blotter sa presinto;

•  Kapin sa 24 oras human sa alarma, wa pa makuha ni Recamara ang license plate number sa silver nga CRV nga gisakyan ni Joavan (segun sa kasaligang tinubdan, gitangtang ang orihinal nga plaka ug giilisan og “For Registration”); ug

•  Wa magtagad si Recamara ug ang iyang mga imbestigador sa pagkuha og kasayuran gikan ni Mayor Fernandez sa mga dapit nga posibleng nahimutangan sa iyang anak.

* * *

Si Recamara nipasabot sa DYAB Radyo Patrol nga naikog siya sa mayor. Matod niya di nila gustong malapas ang katungod sa privacy sa mayor maong wa sila manuktok sa bay sa mayor, nga nahimutang pila lang ka metro gikan sa nahitaboan, tibuok adlaw niadtong Domingo ug igo lang nagpaantaw bisan nakit-an na nilang mayor gahapon sa buntag.

Maayong pahinumdoman si Recamara nga di pribadong krimen ang gipasangil batok ni Joavan, nga di pribadong indibiduwal si Mayor Fernandez ug nga di kalapasan sa balaod ang pagpakisayod dayon sa mayor ug ubang mga suod sa mga tagoanan ni Joavan. Di kapugngan ni Recamara ang mga pagduda nga ang kaikog nanukad sa iyang pagpangayo og plite gikang Joavan sa ilang operasyon sa Mindanao pila ka buwan nang nilabay.

* * *

Email: [email protected]