Balik sa mano-mano sa 2013 election

Daghan karon ang nagsugyot nga mobalik na lang ang Commission on Election (Comelec) sa daan nga pamaagi sa pagbotar sa umaabot nga 2013 lokal election.

Ang pagsugot sa pagbalik sa daan nga paagi sa pagbotar sa mga kandidato nga pinaagi sa pagsulat sa mga pangalan natigayon tungod usab sa katahap nga labaw nga adunay tikas ang paggamit og computer machine sama sa nahitabo sa miaging 2010 election.

Kini ang hinungdan nga human sa piniliay sa 2010 election ang pipila ka mga napilde nga kandidato mipasaka sa ilang petisyon tungod sa ilang katahap sa migawas nga resulta.

Dinhi sa Sugbo usa sa misang-at sa iyang petisyon mao si magpapatigayon Glenn Soco nga una niyang pagsalmot sa politika nakasugat gilayon og kasinatian sa kapildihan.

Apan nagbaton hinuon og katahap si Soco sa resulta sa maong piniliay nga maoy nakaaghat kaniya sa pagduso og petisyon batok sa midaug niyang kaatbang nga kandidato nga si anhing Bise Gobernador Gregorio Sanchez.

Mipakanaug na hinuon og desisyon ang Comelec Manila nga nagpabor gihapon sa kadaugan ni Sanchez apan si Soco wala pa gihapon molugak sa iyang tinguha base sa lig-on niyang basehanan nga nakapatumaw sa iyang katahap sa naangkon niyang kapildihan.

Matud pa niya nga pinaagi sa iyang abogado maoy iyang himoon ang pag-file og motion for reconsideration alang sa pagpadayon sa iyang petisyon.

Gipasabot ni Soco nga wala makahatag og tukma nga paghusay ang buhatan sa Comelec sa migawas nga resulta sa mga boto nga iyang nakuha sa maong piniliay batok sa iyang kaatbang nga kandidato nga si anhing Bise Gobernador Gregorio Sanchez maoy hinungdan nga iyang ipadayon ang pagkuwestiyon niini.

Matud pa nila nga ang paggamit sa computer machine sa piniliay dili gyod masiguro nga walay tikas nga mahitabo kay tawo man ang nag-andam sa machine nga gigamit nga kahimanan.

Dugang pa nila nga maayo pa nga ibalik ang mano-mano nga paagi sa eleksiyon nga isulat ang pangalan sa kandidato ug basahon sa panahon sa pag-ihap kay makita man ug mabati bisan sa ordinaryo nga pagtan-aw ug pagpaminaw niini.

Tingog Sa Katawhan