EDITORYAL - Ang sapa, kanal ug esteros

Pagkataas na og lanat sa panahon, apan ang kadaghanan sa mga namuyo ning siyudad ilabi na ang anaa sa daplin sa kasapaan, kanal ug esteros mao ra gihapon og tua magpuyo sa kalasangan sa panahon pa ni Magellan.

Kini tungod kay kasagaran ning mga tawhana gipadako ang ilang mga anak sa buhat nga mao ra og wala gyud katunob og eskuylahan.

Kay kana gong paglabay sa basura ilabi na ang hugaw sa tawo ngadto sa mga sapa, kanal ug esteros, wa man gud na itudlo sa tulunghaan.

Apan kasagaran sa mga nagpuyo sa daplin sa sapa, esteros ug mga kanal, may pansayan tinuod apan ang tambutso o buhagayanan sa ilang hugaw anaa ipunting sa mga sapa, esteros ug mga kanal.

Busa wala kay makitang sapa , esteros ug mga kanal dinhi sa siyudad nga limpyo, kay gawas sa hugaw sa mga tawo anaa usab ilabay ang ilang mga basura.

Apan masumpo man ang pagtapok sa ilang basura diha sa mga sapa, kanal ug esteros, apan ang pagpungil nianang mga tambutso sa ilang pansayan nga anaa ipunting sa sapa, lisud nang masumpo.

Nagtuo ta nga hangtod sa hangtod na kana, kay inigpahuway sa dayon sa mga ginikanan sa maong mga balay, ipadayon man sa ilang mga anak ang gitudlo kanila, nga ang ilang hugaw gikan sa pansayan kinahanglang anha ipabuhagay sa sapa nga anaa sa ilang likod.

Limpiyo tinuod ang ilang sulod balay, apan ang gilabayan nila sa ilang hugaw puwerting hugawa.

Ang maong hugaw tua puntariya sa dagat nga tabangan og ukit sa mga isdang bugaong, danggit , nukos ug uban pa.

Kuhaon sa mananagat ang maong mga isda ug ibaligya sa merkado, paliton usab ug kaunon sa tawo, sa laktod ang hugaw sa tawo, nakaon ra gihapon sa ilang isig katawo.

Kun ikaw usa ka concern nga opisyal sa syudad, ambot kun di ka ba maugtas ning matanga sa kinaiya sa ubang taga siyudad. Di    ba?