Mga awit Bisaya

Sayo kaayo ko nimata kagahapon dili tungod kay mag-CR kun dili maminaw sa mga awit Bisaya sa programang “Ato Ni Bay.” Sa radio station 99 something.

* * *

Mahigugmaon kaayo ko sa mga awit Bisaya. Ganahan kaayo ko. Bisan unsang klase sa Bisaya nga awit ganahan ko bisag kaihion pugngan samtang wa pa mahuman ang usa ka awit.

* * *

Ug nakabantay ko, ug kamo sab seguro, nga way Binisaya nga kanta nga wala kining mga pulonga: Gugma, katam-is, pagbati, langit, himaya, kalipay, handumanan, kahayag, palad, etc.

* * *

Apan bida, bay, mosinggit gyud kanunay ang kamatayon, lubnganan, lungon, kasingkasing nagdugo, dag-um, pag-antus, luha, etc., etc.

* * *

Giingnan ko sa akong higalang may pagka-komposer nga ang tanang kantang Bisaya mituyoktuyok sa tawo ug sa kinabuhi niini. OK, tubag ko, kasabot na ko. Pero ...apil ba niini ang awit bahin sa paglanding ni Magellan?

* * *

Usbon ko, puwera komedya, nindotan gyud ko sa awit Binisaya. Hasta sab ang akong amo nga si Sir Dodong Gullas ug iyang hamiling asawa nga si Mam Nena. Pruweba sa ilang dakong gugma sa awit Binisaya mao ang ilang pagtukod sa Halad Museum diin ilang gitipigan ang orihinal nga mga Binisaya nga komposisyon.

* * *

Sa laing bahin ... Duna koy higala sa Amerika inig bakasyon sa Sugbo mobalik sa Amerika da ang gatusan ka mga CD ug cassette tapes sa mga Cebuano songs. Dili para sa iyang koleksiyon kundili ipamaligya.

* * *

TRIVIA ... Mga readers nato diha sa mga lungsod ubos sa distrito ni higala Rep. Red Durano, move on lang masulbad nang mga bingkil-bingkil diha.