Huwag pabayaang ma-dengue ang bata

TUWING tag-ulan dumarami ang mga nagkakasakit ng dengue. Kadalasan ay mga bata ang nagkaka-dengue. Mas nakakatakot pa ang dengue kaysa sa Influenza A(H1NI) virus dahil mas marami ang namamatay sa    dengue.

Ang dengue ay walang gamot (suero lang) pero ang A(H1NI) virus ay may gamot. Ang sintomas ng dengue ay ang paglalagnat ng 2 hanggang 5 araw. Kapag nawala na ang lagnat, dito na nag-uumpisa ang peligro dahil puwedeng duguin ang pasyente.

Kadalasan ay dumudugo ang bibig, ilong o nagiging maitim ang dumi (dugo ito sa dumi). Mapapansin din     natin na kakaiba ang hitsura ng pasyente dahil sila’y matamlay, maputla at parang maysakit tingnan.

Kung suspetsa n’yo ay dengue ang sakit, magpatingin agad sa clinic o ospital para mag-pablood test – Complete blood count with platelet count. Kapag bumaba na ang platelet count sa normal, siguradong dengue na iyan. Magpa-confine na sa ospital.

Paano tayo iiwas sa dengue?

Sundin itong mga paraan:

1. Maglinis ng bahay maigi. Tanggalin ang lahat ng kalat at basura sa bakuran at sa loob din ng bahay.

2. Kausapin ang barangay para magkaroon ng “Dengue Clean-up Day.” Kahit malinis ang iyong bahay, kung madumi ang iyong katabing bahay, puwede ka pa rin ma-dengue.

3. Alisin ang mga nag-iipong tubig sa mga lumang gulong, timba, flower vase, bunot ng buko, nag-iipong tubig baha, o tabing estero.

4. Isara ang pinto at bintana sa bahay palagi. Kung pupuwede, maglagay ng screen sa pintuan at mga bintana.

5. Magsuot ng pajama, long pants at long sleeves. Kausapin ang prinicipal na payagang mag-long pants ang mga bata.

6. Maglagay ng OFF lotion sa iyong baro. Kapag nasa labas ng bahay ang bata, lagyan sila ng OFF lotion sa iba’t ibang parte ng baro, mula ulo hanggang paa. Huwag ipahid ang lotion sa balat at baka ma-allergy ka.

7. Magkulambo sa gabi.

8. Paminsan-minsan, gumamit ng insecticide (tulad ng Baygon o Raid). Kung mag-i-spray kayo ng insecticide, siguraduhing walang tao sa kuwarto o bahay sa loob ng 2 oras. Huwag mag-spray sa kusi­na at baka malagyan ng lason ang iyong pagkain.

Maging maalam tayo sa dengue. Turuan natin ang buong komunidad tungkol sa dengue. Buhay ng mga anak natin ang nakasala-lay diyan.