Kiha batok sa Ginoo, kiha batok sa simbahan

Gikiha sa usa ka Senador Ernie Chambers ang Ginoo kaniadtong miaging tuig didto sa Nebraska, Estados Unidos. Ato kining gisulat sa atong pamantalaan niadtong miaging Septiyembre. Giingon nga wala masumoni ang Ginoo sa maong kiha kay bisan unsaon kuno niyag tawag, di man modawat sa sumon. Ang iya lamang kunong punto sa maong kiha mao ang pagpakita sa mga tawo kun unsa na nato ka burokinto karon, kiha’s tuo, kiha’s wala, bisag kinsa pwedeng ikiha, bisan pa ang Ginoo.

Niining pipila ka adlaw, nadunggan nato si Abogado Ely Pamatong nga mikiha sa Simbahang Katoliko. Usa kini siya ka kanhi kandidato pagka presidente sa Pilipinas, nga sulod sa ubay ubay nga katuigan didto manimuyo sa gawas sa nasud. Kini mao ang hinungdan nga nahinumdom kong Senador Chambers.

Mao kini ang naka nindot niining demokrasya. Walay gidid-an sa pagpahayag sa iyang pagtoo, huna-huna ug reklamo basta lang nga nagsubay siya sa paagi nga gitugot sa balaod.

Dili pareha kaniadto sa karaang panahon, ang Simbahang karon luag-luag na ang panan-aw sa modernong sosyedad ug mas demokratiko na usab ang ilang pagtratar sa mga isyu nga ilabay batok kanila. Sama pananglit niadtong gihimo sa Santo Papa dihang mibisita siya sa Estados Unidos. Didto iyang giangkon ang mga kahiwian sa ubang kaparian ug mihimo usab siyag lakang aron nga ang mga biktima sa maong mga kahiwian mahatagan og alibyo.

Atong mabasahan sa mga libro nga sa panahon sa Katsila, kun adunay mosupak sa mando sa simbahan, o bisan mohimo og komentaryo batok sa kaparian, ipaubos gilayon sa excommunication. Kadtong mga gidudahan nga mga miyembro sa grupong Mason gipanglutos kaniadto sa Simbahang Katoliko, apan karon wala na kini gibuhat. Tingali tungod kay lahi ang sitwasyon kaniadto kay sa karon.

Dili pa gyud hinoon hingpit nga nasirad-an ang lihang tali sa modernong sosyedad ug sa simbahang Katoliko. Niadto lang miaging semana, adunay komentaryo ang usa ka tinahod nga Monsinyor nga usa sa tigpamaba sa simbahan, bahin niadtong operasyon sa usa ka mahuyang sa usa ka hospital sa Sugbu, diin gikuhaan kini og video ug gisabwag sa internet sa tibuok kalibutan. Ang komentaryo sa Monsinyor misentro sa unsay gibuhat sa maong mahuyang, dili sa unsay gibuhat sa mga doktor o nars. Gisaway kini sa uban tungod kay lagi, ang isyu alang kanila mao man ang paglapas sa professional ethics sa mga doktor ug nars. Dinhi atong masuta nga ang atong kadagkoan sa simbahan mas matay-og pa diay gihapon sa isyu kun unsay sexual preference sa usa ka tawo, ikomparar sa atong sosyedad karon  nga bale wala kanila kun unsay sexual preference sa usa ka tawo kay ilang gilantaw nga iya kining personal nga katungod. Mas malisang sila kun ang usa ka propesyonal nga gisaligan sa usa ka kompedensyal nga butang sa iyang pasyente mao ang mag-una una ug sabwag sa iyang sekreto.

Tungod niining lihang tali sa modernong sosyedad ug sa  simbahan, nahimugso kining maong kiha ni Abodago Ely Pamatong. Tingali adunay mga punto nga makapukaw sa Simbahang Katoliko aron mohimo og lakang nga mapaduol sila sa dughan sa katawhan. Tingali usab kita mismong katawhan ang makaamgo sa punto nga gustong ipakita ni Senador Chambers. Sama sa usa ka rebeldeng anak ngadto sa iyang ginikanan, kini maghimo usahay og lakang nga walay klarong padulngan, arong lang gyud pagmatuod nga kaya niyang buhaton ang gusto niyang buhaton. Ang mga simbahan sa kalibutan, dili lang ang simbahang Katoliko, nag-atubang karon sa usa ka generation gap.

Alang sa inyong mga panahom, palihug email sa [email protected]. Daghang salamat.