Ilad sa credit card

Daghan ang mga nireklamo karon mahitungod niining mga text messages ug tawag sa cellphone gikan sa kunohay kompaniya sa credit card nga magpahibalo nga kunohay adunay problema ang account sa credit card, nga kunohay wala ma-record ang mga bayad sa credit card, ug uban pang pasangil nga kunohay adunay problema ang credit card. Adunay uban niini nga pangilad ug dili tinuod.

Mailhan ang tinuod nga komunikasyon gikan sa bangko tungod kay kasagaran ikaw ang motawag kanila, ug ang numero nga ihatag mao ang ilang toll-free nga numero nga magsugod sa 1-800. Kadtong mga bogus nga tawag kasagaran mga pribadong numero.

Angay nga hinumdoman nga kasagaran, ang adlaw nga natawhan ug ngalan sa inahan ug susamang mga personal nga impormasyon mao ang password aron nga maka-access sa account sa credit card. Busa, dili maayo nga ihatag kini bisan kang kinsa nga manawag kanimo, ilabi na kun dili ikaw mao ang nanawag kanila sa numero gayud sa bangko o kompaniya.

Ang modus mao nga kunohay ikaw wala makabayad sa imong credit card kay walay record nga aduna ikaw gibayran. Kun motubag ka, pangutan-on ka sa imong ngalan ug numero sa credit card. Usahay moingon sila nga ipa-fax ang kopya sa imong papeles. Dili kini mahitabo sa tinuod nga kompaniya kay ayha sila motawag kanimo, kahibalo na silang daan kun unsay imong ngalan ug numero sa imong credit card. Aduna usay mga kompaniya nga mahimo kang modiretso og tawag sa ilang telepono nga anaa diha mismo sa ilang bangko diin ikaw mobayad. Labaw sa tanan, kuli kaayo nga masayop ang bangko sa dili pag-record sa imong bayad.

Niadtong nasakpan ang mga teroristang mihulga sa seguridad sa Britanya sa miaging tuig, migawas sa mga imbestigasyon nga ang maong mga terorista mipalit sa mga armas ug sangkap sa pabuto pinaagi sa internet, ug ginamit ang numero ug ngalan sa credit card sa inosenteng mga tawo.

Dihang gipalawman ang maong imbestigasyon, ang usa sa mga tag-iya sa account sa credit card misaysay nga dihay higayon nga gipadad-an siyag komunikasyon nga kunohay wala ma record ang iyang bayad sa credit card ug mao nga gipangutana siya sa mga impormasyon mahitungod sa iyang account, sama sa numero sa iyang credit card, iyang ngalan, ngalan sa iyang ginikanan, iyang adlaw nga natawhan ug uban pang kasayuran.

Busa, sa sunod nga adunay manawag ug mangayo og impormasyon bahin sa imong credit card, ikaw mismo ang motawag sa imong bangko o sa kompaniya, o dili ba kaha, bisitahi gyud sila personal. Delikado kaayo nga makabayad ka sa mga pinalit nga dili imo. Ug labaw sa tanan, delikado kun ang imong credit card gigamit aron pagpalit pinaagi sa internet sa mga butang nga gamiton sa mga illegal nga kalihokan.

Alang sa inyong mga panahom, palihug email sa [email protected].

Daghang salamat.