^

PSN Opinyon

Ang Sinulog sa akong kagahapon

- Pepita Jane Petralba, Nixon Kua -

Sa akong kabatan-on, usa  ako sa mga mananayaw sa labing unang Sinulog sa Sugbo, nga gipasiugdahan ni kanhi Customs Collector David “Boy” Odilao. Isip miyembro sa Cultural Dance Troupe sa Southwestern University ubos sa pagdumala sa usa sa labing bantog nga choreographers dinhi sa Dakbayan sa Sugbo, si Sir Myhc Gonzales, mirepresentar kami sa maong eskulaylahan, ug sulod sa pipila ka tuig, wala gyud mi pilde pilde.

Sa pagsugod sa Sinulog, kasagaran sa mga miapil mipareha sa ilang presentasyon sa Ati-atihan ug uban pang nahi-unang mga streetdances. Kasagaran kaniadto magpintal-pintal sa ilang mga nawong ug panit ug managsul-ob og bahag. Wala pa kaniadto ang mga kategorya sa religious-based ug free interpretation. Bugtong ang Southwestern University lamang ang nanagdala og mga kandila ug misayaw sumala sa kumpas ug lakang sa tiil sa Sinug sumala sa naandan sa Basilica sa Sto. Niño. Bugtong usab nga ang mao lamang contingent nga nanag-sul-ob og sapot nga lahi sa ati-atihan. Kining mga istilo karon sa pagsayaw sa Sinulog mao kini ang istilo nga gimugna ni Sir Myhc.  Sa wala pa ang Sinulog, una nang gi-imbento ni Collector Odilao ang Bahug-Bahug sa Maktan. Usa gihapon ako niadto sa primerong mananayaw, ug ang dili nako malimtan niadto mao nga nangapaslot ang among mga tiil kay nagtiniil ming tanan samtang nagsayaw-sayaw sa init ug hait nga baybayon sa Maktan.

Karon nga ubay-ubay na ang akong pangedaron, ang Sinulog mopukaw sa akong kabatan-on ug ang mga kalipay nga akong natagamtan uban sa akong mga barkada sa Southwestern University Dance Troupe. Mao kadto ang panahon nga naka-agi ako og disiplina nga morag sa military. “Blood, sweat and tears”, matod pa sa pagya sa iningles. Ug mao kining mga panahona nga manumbalik sa akong panumduman ang akong giilang “Tatay” o “Yatat” nga si Sir Myhc Gonzales, ug giunsa niyag himo kanako nga makamaong mosayaw bisan nagsugod nga wala gayud akoy hibaw-an niini, kay iya ra man kong pinunitan didto sa WATC nga nag martsa martsa haduol sa praktisanan sa taga Dance Troupe.

Pagkahuman nakog eskuyla, matag Sinulog magkitakita ming managbarkada gikan sa nagka-lain lain nga lugar ug moapil apil gihapon mi sa Sinulog bisan gradwado na mi. Ang akong katapusang apil sa Sinulog mao kadtong 1987, sobra baynte ka tuig na ang milabay. Ayaw na lang tag-ana ninyo ang akong edad. Basta ang Sinulog sa akong kagahapon mao ang usa sa labing malipayon ug memorableng mga adlaw sa akong kinabuhi. Pit Senyor!

Alang sa inyong mga panahom, palihug email sa [email protected]. Daghang salamat.

AKONG

BUGTONG

COLLECTOR ODILAO

CULTURAL DANCE TROUPE

SINULOG

SIR MYHC GONZALES

SOUTHWESTERN UNIVERSITY

  • Latest
  • Trending
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with