Ang agta ug duwende sa Minglanilla

Dako ang kahadlok sa magtiayong Martizano nga taga Minglanilla sa dihang mibutho sa ilang panimalay ang nagpuyo nga sila si Quijano ug Abadilla nga ilang nakaila pipila na ka tuig ang nakalabay ug mipahibalo nga ang ilang anak nga babaye mamatay pagka human sa Sinulog. Hinuon ang ilang kahadlok gipaulian sa dihang gisultian sila sa duha nga dili sila angayan nga mabalaka tungod kay aduna silay higalang agta ug duwende nga andam motabang sa ilang anak aron kini mabuhi. Para pagmatuod gipakita ni Quijano ug Abadilla ang bato ug kortina nga ilang dala nga ilang giingon nga naa niini magtago ang ilang higalang duwende ug ilang gipakigsultian ug gihangyo atubangan sa magtiayong Martizano nga tabangan ang anak niini gikan sa kamatayon. Sa ilang kakurat mitingog tuod ang giingong duwende ug mitando sa ilang hangyo apan nangayo og hinabang. Tungod sa kalipay dali nga gihatagan sa magtiayong Martizano si Quijano ug Abadilla og kantidad nga lima ka libo ka pesos. Apan nagduda na ang magtiayong Martizano sa dihang nangayo na kanila og tres milyones ka pesos ang giingong higalang duwende sa managpuyo nga si Quijano ug Abadilla. Tungod sa ka dako sa kantidad nga gipangayo gipasalig ni Quijano ug Abadilla nga ila kining tabangan sa pagpangita sa maong kantidad. Ilang gitanyag nga sila lamang ang mangita sa katunga sa tulo ka milyon ug ang Martizanos na lang usab ang mangita sa laing usa ug tunga sa milyon. Human sa pasalig minglakaw si Quijano ug Abadilla ug mibalik nianang pagka gabii. Apan sa wa pa sila makabalik dali nga gidangop sa magtiayong Martizano ngadto sa police sa Minglanilla kinsa dali usab nga nakahimo og tukmang lakang ang pangilad sa duruha. Dala ang giingong usa ug tunga sa milyon mibalik sa panimalay sa mga Martizano sila si Quijano ug Abadilla ug gipangita ang laing usa ug tunga sa milyon nga ila usab sa mga Martizano apan gidakop na sila sa mga police sa Minglanilla nga gipangulohan sa hepe niini nga si Santander. Sa dihang gidakop ilang giawhag si Santander sa pagbuhi kanila kay kun dili mangabot ang ilang mga higalang agta ug duwende aron sa pagluwas kanila. Tungod sa kalagot gihagit ni Santander ang mga higalang agta ug duwende nila ni Quijano ug Abadilla sa pagluwas sa duruha. Pila na lang kaadlaw ang nakalabay wa gyuy agta ug duwende nga miluwas sa duruha.

Sa amo sa Bohol daghan nga makighigala og agta ug duwende sa pamasin nga hatagan kini sila og kuwarta. Pero sa VelPal, Minglanilla sa lalawigan sa Sugbu lain man ang ilang agta ug duwende di man manghatag, mangayo man nuon, milyon pa. Unsa man diay ning agta ug duwende sa Minglanilla pobre?

Matud pa sa texter sa akong programa sa DySS kaniadtong Sabado, ang agta ug duwende kuno sa Minglanilla mga pobre kay ang agta ug duwende nga dato toa man magpuyo sa Malakanyang.

Lisud na gyud ron ang atong panahon, di na ta basta-bastang makasalig sa mga magpailang atong kaila kay ilaron ka ra.