Opinyon bersus ebidensya

Nabalita  dili pa lang  dugay   ang  resulta  sa  survey  nga  nag-ingon nga  ang  pamunoan  ni  Presidente Gloria  Macapagal-Arroyo mao ang pinaka-corrupt kun ikomparar sa mga  nangaging administrasyon.  Matud  pa  sa  maong   survey,  mas  corrupt  pa  gani   ang  pamunoan  karon  kun  ikomparar   kaniadto  ubos  ni  Presidente  Marcos ug Presidente Estrada. Ang maong survey  gipahigayon sa usa ka kompaniya nga giingong gipanag-iya sa ig-agaw ni Fernando Poe Jr., kinsa gitumbok nga suod kang Presidente  Estrada  ug  mga  taga-oposisyon.

 Dinhi sa Sugbu ug Kabisayaan nga nangusog sa pagpalagpot  kaniadto ni Presidente Marcos ug Presidente Estrada, ang sagad nga atong madungog mao ang mga bagolbol sa corrupt nga pangagamhanan sa duruha. Gani namatud-an kadtong mga alegasyon pinaagi sa mga ebidensya nga gipresentar ubos sa  estrikto nga pagsusi sa mga korte.

 Bisan  kun  konbiktado ug dili na malalis ang pagka corrupt ni  Presidente Estrada, nagpadayon gihapon kini sa pagpahimulos sa  usa  ka  gawasnon  ug  buhong   nga  kinabuhi,  ug  gani,  alang  sa  uban,  mas  gi-idolo  pa   siya  tungod  sa  iyang  pagka-konbikto  sa  salang  pagpangawkaw. Kini  tungod   kay  gihatagan  og bulok politika ang proseso bisan kun nag-agi  na   kinig  makuting pagsusi  sa  hudikatura.   Mao-mao  usab  kini ang  nahitabo sa pamilyang Marcos kinsa  nagpahimulos   sa  pagkadato  nga  walay  hubas  hubas  hangtod  karon.

Dihang  nahimong  Numero   Uno  ang  Pilipinas  sa  pagka-corrupt pipila   ka  bulan  ang  milabay,   giingong   ang  hinungdan  niini mao  ang pagkapakyas niining pamunoan karon sa pagbawi sa mga  kinawkaw ni Marcos. Karon usab nga namatud-an si  Presidente  Estrada nga mikawkaw sa salapi sa katawhan, nagpabiling pakyas ang pamunoan aron nga mahibalik ang giingong kinawkaw nga salapi.

Bisan kun wala pay husgado nga nagpamatuod nga corrupt ang administrasyon karon, adunay mga basehanan ang reklamo sa pipila. Dinhi sa Sugbu, adunay mga dokumento nga nagtumbok nga  kadtong mga lampposts sa miaging ASEAN Summit sobra kaayo ang pagpresyo. Mga simpleng suga sa dalan nga dili gani mobalor og sobra sa diyes mil gipresyohan og duol usa ka gatos ka libo ka pesos, ug aduna pa gyuy gipresyohan og sobra sa duha ka gatos ka libo ka pesos matag usa. Kun imong kwentahon pila ka buok lampposts ang gipamutang ug pila ka milyon ang giabot niining kurakot, mahulog kita sa atong  gilingkoran, ilabi na kay ang maong mga suga wala nay silbi paglabay sa pipila lang ka  bulan. Apan nagpaka buta-bungol   ang  pangagamhanan  paggukod  sa  mga hingtungdan.

 Karon ang giingong opinyon sa katawhan, kun atong tuhoan ang resulta sa survey, mao nga ang labing corrupt nga pamunoan mao kining administrasyon karon. Kini bisan pa sa pagka konbikto ni Presidente Estrada ug sa maklarong hilabihan ka dato sa mga Marcos  nga nagpuyo sa usa ka worldclass nga lifestyle nga wala matagamtami bisan ni Presidente Arroyo. Kining maong opinyon nga giingon sa survey, bisan kun dili suportado sa ebidensya, posible nga nagumikan sa kalupig sa mga torotot ni Presidente Arroyo kun ikomparar sa mga torotot ni Presidente Estrada. Kinsay nasayud kun kinsa gayud kanila ang mas labaw nga corrupt? Sa politika, ang reputasyon sa usa ka politiko mag-agad sa mga tigpamaba kun spindoctors ug PR men. Daw sama sila sa mga aktor sa entablado ug usahay ang makita sa katawhan mao lamang ang usa ka ilusyon ug dili ang  katinuoran.

* * *

 Alang  sa  inyong   mga  panahom,  palihug  email  sa   [email protected].  Daghang   salamat.