^

PSN Opinyon

Protesta

- Pepita Jane Petralba, Nixon Kua -

Karong adlawa maoy katapusang adlaw alang sa pagpasaka sa protesta niadtong nangapilde sa miaging eleksyon sa barangay diin ang proklamasyon gipahigayon pagka petsa 30 sa Oktubre, samtang kagahapon pa ang katapusang adlaw sa pagsumiter sa maong protesta alang niadtong mga barangay diin napahigayon ang proklamasyon sa samang adlaw sa piniliay niadtong Oktubre 29. Kini tungod kay adunay mga barangay nga naka-proklamar dayon sa mga mananaog pagkahuman sa eskutinyo nga wala ma-ugma.

Ang adunay gahom sa pagbista sa protesta sa piniliay sa barangay mao ang Municipal Trial Court. Adunay bayranan nga filing fee inig pasaka sa kaso ug kinahanglan nga bayran dayon kini inig pasaka sa kaso kay kun dili mabayran ang filing fee, isipon nga walay protesta nga gipasaka. Ang tanang reklamo batok sa eleksyon mahimong sukaran sa pagpahigayon sa protesta: ma-depekto man kini sa paagi sa botasyon, sa pag-ihap sa balota, sa Election Returns, terorismo o uban pang iregularidad nga maka-apekto sa resulta sa piniliay. Apan kinahanglan nga ang mopasaka sa kaso mao mismo ang kandidato nga napilde ug ang pasakaan sa kaso kinahanglan nga kadtong midaug ug naproklamar. Nahinumdum ko niadtong pila ka eleksyon ang miagi, dihay usa ka naproklamar nga kapitan nga giprotestahan sa usa niya ka kontra. Unya kadtong miprotesta gi-protestahan usab sa laing pildero nga kandidato. Sayop kining maong paagi tungod kay ang mahimong protestahan kadto man lamang naproklamar. Sa sitwasyon nga sama sa gihisgotan sa unahan, ang angay nga buhaton sa laing kandidato kinsa agrabyado sa miprotesta, mao ang pag pasaka sa usa ka Intervention sa samang korte diin napasaka ang orihinal nga protesta.

Kadto usang giprotestahan mahimong mobali pagkiha pinaagi sa Counter-Protest alang sa mga ballot box nga wala maapil sa protesta. Apan gikinahanglan gihapon nga mabayran ang filing fee ug deposito aron mabalido ang maong Counter-Protest. Mao kini ang leksyon sa kaso ni Aristotle Batuhan batok kang Kongresista Tony Cuenco diin ang naulahi napakyas pagbayad sa mga balayranan sa iyang Counter-Protest nga miresulta sa pagka-basura niini. Maayo nalang gani kay wala siya labwi sa ihap sa orihinal nga Protesta batok kaniya.

Dili tanang gipasikaran sa protesta magkinahanglan nga moabri sa ballot box. Diha kadtoy usa ka protesta batok sa mayor sa Opon kaniadto diin gipasakaan og protesta tungod kay migamit kuno sa budget sa Clean and Green aron ipamalit og botos. Tungod kay ang ebidensya nga magprobar sa maong iregularidad dili man makita diha sa sulod sa ballot box bisan kun unsaon niinig abri, dan dili na kinahanglan nga mag-abri sa ballot box aron maresolbar ang protesta. Sa sama niining mga kaso, ang gikinahanglan mao lamang ang pag-presentar sa mga ebidensya nga anaa sa gawas sa ballot box, kun evidence aliunde.

Hinuon, kun ang pasangil nga maoy gibasehan sa protesta mao ang sayop o iregularidad parte sa gidaghanon sa botos nga nakuha sa usa ka kandidato, dan kinahanglan nga abrihon gayud og iphon ang botos sa sulod sa ballot box. Ang pagsubli pag-ihap sa mga balota mao ang gitawag nga revision proceedings, ug mapahigayon lamang kini kun makadeposito ang reklamante sa kantidad nga giseta sa balaod ug sa korte. Ang gi-deposito nga kantidad mao ang gamiton alang sa pagsweldo sa Revision Committee nga langkoban sa representante sa korte, sa kihante ug sa gikiha.

Gastoso ang protesta ug wala gyuy sama ka tam-is sa kadaugan nga dihadiha makab-ot sa usa ka kandidato pagkahuman dayon sa piniliay. Alang sa mga nangapilde sa milabay nga eleksyon, good luck sa inyong protesta, ug better luck next time.

Alang sa inyong mga panahom ug reaksyon, palihug email sa [email protected]. Daghang salamat.

COUNTER-PROTEST

COUNTRY

MAO

PLACE

PROTESTA

REGION

  • Latest
  • Trending
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with