EDITORYAL - Mga kwestyonableng fraternity

Morag nalimtan na lang ang mga kalihukan sa mga badlongong sakop sa mga pundok nga nagpaka-fraternity diin nang-recruit kinig mga batan-ong estudyante aron mahisakop sa ilang grupo.

Wala nay balita bahin niining recruitment sa mga bag-ong sakop sa nagkadaiyang fraternity apan wala kini magpasabot nga naundang na ang maong salawayon nga kalihukan.

Dili pa lang dugay, usa ka amahan ang misumbong sa Banat News nga ang iyang 14 anyos nga lalaki gipugos sa pagsalmot sa usa ka fraternity.

"Ilang gihulga nga patyon ang akong anak kon dili moapil sa ilang initiation rite isip pasiunang lakang sa iyang pagkahisakop sa fraternity," suma pa sa amahan.

Tungod sa kahadlok, milayas ang anak ug wala na hibaw-i asang suok sa nasud nagpuyo o nagtago.

Nagtuo ang amahan nga aduna pay laing mga batan-on nga gumikan sa kahadlok sa mga notoryus nga lider sa fraternity miundang sa pagtungha.

Nanghinaut ang gihisgutang amahan nga hugtan sa kapolisan ang kampanya batok niining mga kwestyonableng pundok.