Matag adlaw magka-daan ang bag-ong tuig

Sama sa nanglabay'ng katuigan, di lang nato mamatikdan nga magka-daan ang bag-ong tuig. Ug kon mosuway mog lingi sa gahapon, inyong makita nga sa daghang bag-ong tuig nga nilabay sa inyong kinabuhi, waa gyud kiniy makahimog bag-o sa atong kaugalingon ug sa palibot.

Sa ato pa, sa ato nang gibalikbalik dinhi, ang kalendaryo ra gyuy bag-o. The rest mao lang gyud gihapon. Sumaa, tapus sa pila ka adlaw o pila ka semanang nilabay gikan sa Enero uno, unsa man, unsa may na-bag-o kanimo ug sa imong palibot? Di ba mao lang ka gihapon ka-buang? Kon duna may kausaban, kausaban for the worst.

Mao ni akong giingon nga pagka-usik sa mga tuig nga nilabay sa atong kinabuhi. Unya, happy new year kono. Unya, unsaon pagka-happy nga ang atong mga elective officials di man gustong mobuhi sa ilang gahom, di na gustong mag-eleksiyon pa, aron padayon sila sa nindot nilang pagkabutang. Unya, happy new year?

Mokalit lang nig ka-Pebrero, tapus sa Sinulog. Unya, mo-Marso, Abril, ug di lang hibaw-an, mag-new year na sad ta.

Pagka-karon how do you look at 2006? Di pa maklaro no? Apan, ikaw, how do you look at yourself? Di gihapon ma-klaro? Nganong di man ka klaro naunsa ka? Di maklaro tungod kay actually, waa ka maunsa. Sa ato pa, mao lang ka gihapon, ang tuig ray nausab. Maoy hinungdan nga tapus sa Enero Uno, pagka-Enero Dos, waa tay makitang kausaban tungod kay nothing is changed in us and in all the things around us.

Mao ni ang nahitabo sa daghang bag-ong tuig nga nilabay sa atong kinabuhi. Ug mao sad ang mahitabo sa karon nga tuig. Panid-i ninyo, di ba, mao lang gihapon ka-buang ang imong bana, mao lang gihapon ka-maldita ang imong asawa, mao lang gihapon ka badlongon ang imong mga anak, mao lang gihapon ka libakira ang imong silingan, mao lang gihapon ka corrupt ang inyong mga public officials, mao lang gihapon ikaw ka tikasan, mao lang gihapon ang tanan sa imong palibot, nothing is changed, but the year.

Mao kini ang reality sa kinabuhi. Ug kining tanan mag-agad sa tawo mismo. Kon unsa ikaw, mao usab ang atong masinati sa atong palibot. Kon unsa ikaw, mao usab ang atong nasud. Kon unsa karon ang atong nasud, reflection kini unsa ikaw.

Mao nga waay labut ang mga bag-ong tuig sa atong kinabuhi. Kon buot hunahunaon, ang tuig mag-agad kon unsa kita. Maoy hinungdan nga immediately after mo-subside ang mga pabuto sa bag-ong tuig, mobalik dayon ta sa mga naandan. Sa ato pa, mobalik tang tanan sa atong kabuang. Dali ra kaayong ma-old ang new year. Unya, happy new year, Dro?