Tangkang pagpuslit ng mga sasakyan, napigilan ng BOC
MANILA, Philippines — Napigilan ng Bureau of Customs (BOC) ang tangkang pagpupuslit ng mga sasakyan, na unang idineklarang mga auto spare parts sa Cagayan de Oro City.
Sa isang kalatas kahapon, sinabi ng BOC na nakumpiska ng mga operatiba ng BOC-Port of Cagayan de Oro ang shipment, na dumating sa Sub-Port of Mindanao Container Terminal noong Pebrero 12, 2024, mula sa Japan.
Una itong idineklara na naglalaman ng 55 pakete ng mga used auto spare parts.
Anang BOC, kaagad na hiniling ng Customs Intelligence and Investigation Services, Enforcement and Security Service, at X-ray Inspection Project kay Port of Cagayan de Oro District Collector Alexandra Lumontad na mag-isyu ng alert order para sa full physical examination ng subject shipment matapos na makatanggap ng derogatory information hinggil dito.
Nadiskubre naman sa physical examination ang discrepancy sa shipment, na naglalaman pala ng isang unit ng used 1985 Suzuki Jimny, isang unit ng used 2001 Mercedes-Benz G Class, isang unit ng used 2003 Toyota LC Prado, at isang unit ng used 1995 Toyota LC Prado.
“Based on the examination report, the vehicles were assessed with aggregate landed costs, including duties, taxes, and other charges, in the amount of P6.7 million,” anang BOC.
Anang ahensiya, isang Warrant of Seizure and Detention (WSD) ang inisyu laban sa subject shipment dahil sa paglabag sa Section 1400 na may relasyon sa Section 1113 (f) at (l) 3, 4, at 5 ng Customs Modernization and Tariff Act (CMTA).
- Latest
