Bayani sa okasyon

Sa usa ka hektaryang luna sa baybayon gipahigayon ang mega reunion sa Hisoler Clan. Tulo ka adlaw nga giabangan ang Olefernes Beach Resort. Nagtampotampo ang mga Hisoler sa lungsod sa Bantayan diin nahimutang ang maong beach resort. Sila ang host niining maong okasyon. Ang mga gipang-imbitar sa reunion tanang kaliwat ug natapik sa Hisoler clan bisa’g dili na Hisoler ang apelyido. Dunay daghan gikan sa Madridejos, Santa Fe ug tanang lungsod sa Isla sa Sugbo. Dili lang sa tibuok Sugbo hasta pa ang gikan sa Luzon, Visayas ug Mindanao.

Tulo ka adlaw ang reunion. Mayo 25, 26 ug 27. Karon lang mahitabo sa maong reunion gna nagdungan ang kinantahay ug sinayaway. Kay ang katunga sa wanang sa beach resort gihimo’g diskohan. May mga dancing lights ug sipa nga sound system. Ang laing katunga dunay videoke. Ang di gustong mosayaw, puwede mokanta. Ang di gustong mokanta, puwede mosayaw. Ang dili gustong mokanta ug mosayaw, duna sab sila’y puwesto. Naglibot ang mga cottages sa maong beach resort. Ang mga cottages daw mga town houses nga gagmay. Ang dili paigo sa mga cottages, gikuyogan ngadto sa giarkela nga laing mga cottages sa mga sikbit nga baybayon.

Sa unang adlaw, informal pa ang pundokpundok. Binayranay og registration fees. Pinalitay og mga souviners sama sa mga t-shirt, paypay ug ubang mga ginagmay’ng butang sama sa keyholders gikan sa recycled materials sa basura.

Sa ikaduhang adlaw, gipaila na ang tagsatagsa ka representative sa kada lungsod o siyudad diin nanagpuyo ang mga kaliwat. Ang pinakadaghang nanambong gikan sa Bogo. Sunod gikan sa dakbayan sa Sugbo. Sunod gikan sa Leyte, Negros ug ubang mga siyudad sa Mindanao. Gipasulti silang tanan.

Unya ang nakapahinuklog sa tanang kaliwat mao si Manny Hisoler nga representative sa dakbayan. Siya nga taga showbiz, usa ka bantogang artista sa radio ug telebisyon, dakong negosyante ug inila nga songwriter singer, maoy gisumbongan sa usa ka dili maayong hitabo nga napabuakbuak sa Hisoler clan. Na-faction-faction na diay ang mga Hisoler sa Bantayan.

“Ang politika lumalabay lang. Ang pagkaparyente ug pagkakadugo permanente na. Dili nato bungkagon atong pagkamag-agaw tungod lang sa politika. Wala koy plano nga molansar aron magpabuto. Miyembro na ko sa usa ka relihiyoso nga kapunongan nga gitawag og Gentile Church of God. God is love. Busa maghigugmaay ta. Kun gihigugma nato ang usa’g-usa kanato respetohon nato ang katungod ug kagawasan sa usa’g-usa. Usa ka politikanhong katungod ug kagawasan ang pagpili og kandidato. Busa respetohan nato ang katungod ug kagawasan sa usa’g-usa. Sama ra sa pagkaon nga katungod ug kagawasan nato sa pagpili sa atong gustong kaunon. Kadtong dili gustong mokaon og baboy, dili nila angay awayon ang gustong mokaon. Kadtong gusto’g utan ug isda, dili nila awayon ang dili gusto’g utan ug isda. Mao nga kamong nanagbangi tawgon ta mo tagsatagsa ug ipakita ninyo atubangan sa tanan natong kaliwatan nga gisalikway na ninyo ang kayugot sa usa’g-usa tungod lang sa politika” nahimong taas-taas ang pakigpulong ni Manny ibabaw sa bantawan nga gimugna alang ning okasyona.

“Larry Hisoler, Rene Hisoler, Antonio Hisoler ug Brendo Hisoler Manto. Nakit-an ko kamo nga naglagyoay na ug wa nagtinagdanay. Nasayod mo’g kinsay gikabangi ninyo. Gihangyo ko kamo sa pagsaka sa bantawan. Pagpasayloay mo sa inyong gikabangi. Maglamanohay mo. Maggakos. Ug kalimtan na dayon ang deperensiya. Dili ko mobiya ining bantawan kun dili ni mahimo rong gabhiona. Mahimo’g moluhod ko sa inyong atubangan tagsatagsa aron lang matuman ang gusto sa kinatibuk-an sa atong tribo” ni Manny nga giliraw ang mga mata libot sa habagang duot sa katawhan nga di mominus sa usa ka libo.

Hinayhinay’ng nanuol ni Manny ang gipangtawag. Dihang nakompleto na sila, gipalamano ni Manny silang tanan. Gipagakos. Nakahilak si Manny sa kalipay. Niluhod siya’s atubangan sa upat agi’g pasalamat sa pagtubag sa iyang hangyo. Namakpak ang kinabag-an sa tribong Hisoler. Namahid sa ilang mga luha. Nakahilak sab sila sa ilang nasaksihan. Hilom silang mapasalamaton ni Manny sa iyang gibuhat. Giila siyang bayani sa maong okasyon. (Kataposan)