Priso Kabalyero

Gula 4

“Matulog na ko Sir kay mora man og nalipong ko sa akong nainom,” matud ni Orchids nga mihana og gawas sa opisina aron moadto sa kuwarto nga paestahan kaniya ni Major Navarez.

Gigunitan siya sa warden. “Ayaw na paggawas kay mahimo ra man nga ari ta moagi sa sekretong pultahan paingon sa kuwarto.” Daw nahuwasan si Orchids sa iyang nainom pagkadungog sa gisulti sa warden kay nakasabot siya nga mouban si Major Navarez sa kuwarto.

“Ha? Mouban ka sa kuwarto Sir? Matulog na man ko,” matud ni Orchids. Wala motingog si Major Navarez ug giagbayan siya sa warden paingon sa usa ka bahin sa bungbong. Gitukas ni Major Navarez ang kurtina nga nagbitay sa bungbong ug diha pa masayri ni Orchids nga duna diay pultahan sa maong dapit.

Giyawehan sa warden ang siradoha sa pultahan ug diha-diha kini nga naabli. Gipasiga niya ang suga sa lawak. “Dali na Orchids, ayaw kahadlok,” ni Major Navarez pa apan gikulbaan g’yud si Orchids.

Mapinanggaon nga giagbayan ni Major Navarez si Orchids og gialalayan kini paingon sa usa ka kama. Gihagkan sa warden ang dalaga nga igo lang miduko. Gibati og kahadlok si Orchids nga kun mosinggit siya masuko kaniya si Major Navarez ug isulod unya siya sa selda.

Mikusog pag-ayo ang kulba sa iyang dughan. Nahisama kini sa usa ka lusong nga gilubok og alho nga nagbutok-butok sa kakulba sa sunod nga mga panghitabo.

Gipalingkod si Orchids ni Major Navarez sa ngilit sa kama ug milingkod usab ang opisyal sa bilanggoan. “Orchids, naibog gyud kaayo ako kanimo ug ayaw ko pakyasa sa akong gusto karong gabhiona,” matud sa warden.

Gipakaligo og mga hawok sa warden si Orchids. Sa nagpadayon nila nga romansa gitagsa-tagsa paghukas ni Major Navarez ang mga sapot nga gisul-ob sa dalaga. Pagkahuman, si warden Navarez na usab ang naghukas sa iyang mga sapot.

Wala nay laing nahimo si Orchids gawas sa pagtugyan sa iyang pagka babaye ngadto sa warden. Makatulo ka higayon nga giangkon ni Major Navarez ang pagka babaye ni Orchids. Kaadlawon na nga nahuman ang ikatulong hugna sa ilang kumbati.

Milabay ang mga adlaw. “Orchids, arraignment karon sa imong kaso didto sa korte. Si JO1 Rosvel Atienza ang mo-escort nimo paingon sa hukmanan,” matud sa administrative officer nga si Leon dungan sa pagtudlo sa batan-ong guwardya.(Sumpayan)