Kim nasakitan sa picture ni Gerald sa net

Gikaguol ni Kim Chiu human niya nasayri nga mikatap sa Internet ang hawkanay sa iyang ka-love team nga si Gerald Anderson ug sa kanhi girlfriend niini nga si Farina Runkle.

Ang maong hawkanay nahitabo sa wala pa musulod si Gerald sa Pinoy Big Brother House diin nahimo siyang first runner-up ni Kim.

Tsika sa PangMasa nga ang maong picture sa Internet ang usa sa mga hinungdan nganong kutob ra sa top 40 si Farina sa "StarStruck: The Next Level" sa GMA-7. Natangtang na siya.

Apan gitin-aw ni Kim nga dili makaapekto ang maong picture sa loveteam nila ni Gerald ug mosuporta siya sa naulahi, ilabi na nga hapit na isalida sa telebisyon ang ilang labing unang teleserye nga, "Sana Maulit Muli" sa Channel 2.

Nasayran nga ang "Sana Maulit Muli" istorya sa duha ka mga bata nga kuyog nga milayas apan nagkabuwag gumikan sa trahedya, ug magkita ra usab sila og balik sa tukmang panahon.

Sila si Jerome Pobocan ug Tots Sanchez-Mariscal ang direktor niini, samtang apil sa cast sila si Tonton Gutierrez, Glydel Mercado, Mickey Ferriols, Gloria Diaz, Erich Gonzales, Mark Bautista ug Michael de Mesa.

Starstruck top 20, "kilatison" na

Karong gabii, pormal na nga ipaila ngadto sa entertainment press ang 20 finalists sa "StarStruck: The Next Level" sa Studio 3 sa GMA Network Center.

Daghan ang nakauyon sa mga nasulod sa top 20 tungod kay matud pa tataw nga nagsag-a gayud ug maayo ang mga finalist ug sulod lamang sa duha ka semana, nakita na ang ilang nagkadaiyang potensyal.

Puros gwapa ug gwapo ang nasulod diin lakip na niini mao sila si Hazel Uy ug Chad Burden from Cebu ug si Rich Asuncion sa Bohol.

Lahi ang Starstruck karong tuiga tungod kay upat ang mogawas nga mananaug, duha ka Ultimate Winners, Ultimate Sweetheart ug Ultimate Hunk.