Pagsubang ni Samantha

Siya mahiligon sa sayaw. Apan sa milabayng tuig nahimong interesado usab sa kanta Sa pangidaron nga nuwebe anyos hinay nga mikulit og ngalan sa natad sa musika. Siya walay lain kondili si Samantha " Sam" Abadilla, lumad nga taga Basak Pardo ug usa sa labing lig-on nga sakop sa Little Chanters sa University of San Jose Recoletos-Basak Campus.

Soprano o taas ang tingog ni Sam hinungdan nga dili na ikahibulong kon nganong sulod lang sa usa ka buwan, sa nakalabay nga tuig, tulo ka mga titulo o luna ang iyang nalangkat gikan sa tulo ka mga indigay sa kanta. Niadtong December 2005 si Sam ang grand champion sa Quest for Young Singing Idol nga mabati sa El Nuevo Bantay Radyo matag Domingo sa hapon, second placer usab siya sa grand finals sa dyLA Super Show ug grand champion sa dyRB singing contest. Dugang pa niana Star of the Month alang sa buwan sa Pebrero sa nagpadayong Little Big Star -Cebu sa ABS-CBN.

Si Sam kamanghoran sa duha ka magsuon nga anak sa magtiayong si Merissa usa ka aerobics instructor ug Jericho usa ka fitness trainer. Ang iyang maguwang ginganlan og Kim ug karon dose anyos na.

Alegre hunahunaon nga si Sam kaniadto mahiligon sa sayaw. Apan gumikan sa iyang nindot nga tingoggidasig siya sa iyang mga ginikanan nga suwayan usab ang pagkanta. Sa nakalabay nga tuig pa lang nagpasakop si Sam sa Little Chanters diin mas nahaniti ug nabaid siya og maayo hinungdan nga duna na siyay dakong pagsalig sa iyang kaugalingon diin dili na siya kulbaan sa higayon nga motongtong siya sa entablado. Si Richard Mascardo, trainer sa Little Chanters usa sa mga mapasigarbohon kaayo sa kalampusan nga naangkon ni Sam sanglit nasundan niya ang pagkatkat sa atong bida sa hagdanan sa kabantog.

Tungod kay siya may grand finalist, si Sam apil na isip host sa Quest for Young Star Idol nga gipasiugdahan sa Diomariz Ads&Promotions diha sa Elizabeth Mall ug mabati sa kahanginan pinaagi sa El Nuevo Bantay Radyo matag Domingo sa hapon.

Bisan pa man niini, wala gihapon mabiyai ni Sam ang iyang pagtuon sanglit dagko man gihapon siya og grado bisan pa man og busy siya sa mga nagkadaiyang pasundayag.