Tulo ka energy bills giduso sa DOE

CEBU, Philippines — Giduso sa Department of Energy (DOE) ang tulo ka importanteng energy bills sa Kongreso nga gitumong sa pagpalig-on sa energy security, pagpaubos sa gasto sa kuryente ug pagpalapad sa paggamit sa renewable energy sa nasud.

Una niini ang National Strategic Petroleum Reserve Program nga magmando sa Philippine National Oil Company (PNOC) sa pagtukod ug pagmentinar sa government stockpile sa krudo ug refined petroleum products.

Ang stockpile balor og 120 porsiyento sa hiniusang 90-day fuel requirement sa Luzon, Visayas ug Mindanao aron adunay fuel buffer ang nasud kung adunay oil supply disruptions ug kalit nga pagsaka sa presyo sa lana.

Ikaduha ang pag-amendar sa Republic Act No. 9136 o ang Electric Power Industry Reform Act (EPIRA), lakip ang pagpalig-on sa Energy Regulatory Commission (ERC) ug pagsulbad sa isyu sa system loss.

Lakip sa gisugyot ang pagdugang sa mga commissioner sa ERC gikan sa upat ngadto sa hangtod siyam, samtang padayon usab ang paghisgot sa DOE, ERC, National Electrification Administration, electric cooperatives ug distribution utilities bahin sa system loss.

Ikatulo ang giduso nga Sariling Kuryente Act nga magtugot sa mga konsumidor sa pag-instalar og rooftop solar panels ug battery systems behind the meter nga dili na kinahanglan og ERC permit.

Pinaagi niini, ang ERC maoy magtakda sa technical standards aron masiguro nga dili makabalik sa distribution utility o power grid ang kuryenteng mamugna sa mga solar power sources.

Giduso usab sa DOE nga palig-onon ni og maayo pinaagi sa financing mechanisms ug incentives aron mahimong mas barato alang sa mga panimalay ang rooftop solar ug battery systems. — /IBM (BANAT NEWS)