Nangilad sa vendor

CEBU, Philippines — Gidakop sa National Bureau of Investigation-Cebu Division Office (NBI-CEBDO) ang duha ka lalaki nga gipasanginlang nangilad pinaagi sa pagpakaaron-ingnong adunay sila’y awtoridad sa pag-offer o pagpa-lease sa mga bodega sa Carbon Public Market sa Cebu City.

Matud ni NBI-CEBDO chief Arnel Pura sa press conference kagahapong adlawa, September 7, 2026, ang mga suspetsado nga sila si Paquito Enriquez Asignar Jr., alyas “George” ug “Jun,” ug Rosalito Ventulan Arong, gidakop niadtong Septembre 1 human sa reklamo nga gisang-at ni Carbon Market vendor Melinda Bingil.

Matud ni Pura, nagpaila kuno si Asignar nga awtorisado siya sa Cebu City Market Office sa pag-award sa mga bodega ug nangayo og P50,000 alang sa matag slot.

Apan sa wala pa mahitabo ang transaksyon gisusi ni Bingil sa City Market Office ang pangangkon ni Asignar ug didto niya nasuta nga dili tinuod ang mga pangangkon niini.

Nakuha usab sa NBI ang certification gikan kang Cebu City Market Administrator Elconjim Concha nga nagpamatuod nga dili otorisado si Asignar sa pag-award o paggarantiya sa mga bodega.

Tungod niini, gilusad dayun ang entrapment operation pasado alas-5:30 sa hapon niadtong Sept. 1 sa palibot sa Puso Village sa Barangay Sto. Niño, Cebu City.

Human giingong gidawat sa suspek ang marked money gikan kang Bingil gihamagan dayun siya ug gidakop sa mga operatiba sa NBI-7.

Matud ni Pura, giangkon ni Asignar nga aduna siyay impluwensya ug otorisasyon sa pag-transact sa ngalan sa Cebu City Government, samtang si Arong giingong nangangkon nga adunay katungod sa usa ka bodega ug nagtanyag niini sa mga interesado.

Gi-refer ang duha ngadto sa Cebu City Prosecutor’s Office niadtong Sept. 3 alang sa inquest proceedings tungod sa kasong estafa ubos sa Article 315 sa Revised Penal Code, as amended, ug usurpation of authority.

Gipasabot ni Pura nga walay labot ang opisina ni Cebu City Mayor Nestor Archival sa maong mga transaksyon ug giingong gigamit lang ni Asignar ang ngalan sa Mayor’s Office.

Giklaro usab ni Pura nga dili empleyado sa Cebu City Government si Asignar job-order  o casual worker man.

Si Arong maoy job-order worker nga naka-assign sa Cebu City Market special task force. Apan gihimakak sa CMO nga naa kini lease sa usa sa mga bodega base sa ilang mga rekord.

Matud ni Concha, walay otorisastib si Arong pagkolekta og kuwarta gikan sa mga vendors nga interesado sa bodega.

“Because the payment should be made before the City Treasurer’s Office,” matud ni Concha.

Gipasabot usab niya nga adunay pipila ka lakang sa pagkuha og market stall o bodega, lakip ang pagsumite og letter of intent ug evaluation sa mga tukmang opisina sa dili pa ma-award ang slot.

Gidasig ni Concha ang mga vendor nga direktang makig-coordinate sa City Market Office ug dili ni bisan kinsang mopresentar sa kaugalingoon nga naay gahum pag-offer og market spaces.

Base sa verification, adunay pending estafa case si Asignar sa Camarines Sur nga nagsugod pa niadtong 2015. Bag-o lang usab siya nadakpan may kalabotan sa laing estafa case sa Lapu-Lapu City.

“Notorious na siya ani nga butang,” matud ni Pura.

Samtang, matud ni Bingil nga misugot siya sa transaksyon tungod kay nanginahanglan siya og dugang nga storage space para sa iyang negosyo sa pagbaligya og saging.

Matud niya, una na siyang mibayad og P25,000 niadtong Hulyo ug laing P25,000 niadtong Agosto 2, kay nagtuo siyang makakuha siya sa bodega slots nga giingong Nos. 85 ug 87.

Mibayad usab siya og dugang P3,000 human hangyoon nga bayad alang sa document processing.

Matud ni Bingil, misamot ang iyang pagduda dihang wala siya hatagi ni Asignar og resibo sa iyang mga nabayad, hinungdan nga nangayo siya og tabang sa NBI.

Matud niya, dili lang refund ang iyang tumong kundili gusto niyang mapahunong ang giingong pamaagi aron dili na mabiktima ang ubang vendor. Gidasig ni Pura ang ubang indibidwal nga posibleng giduolan gamit ang susamang pamaagi nga moduol ug moreportar sa ilang mga reklamo ngadto sa mga awtoridad.

Sa laing interview, mibalibad si Asignar sa pagtubag sa mga pangutana sa media ug miingon nga atubangon niya ang kaso uban sa tabang sa iyang abogado.

 “Mangayo lang kog sorry ni maam, ug pasalamat ko… igo ra pud ko nisulod,” matud ni Arong. – IBM BANAT NEWS