Suspek pagpunggot sa Ginang nadakpan

CEBU, Philippines — Suspek sa pagpatay ug pagpunggot sa ulo sa usa ka caregiver kansang ulo nakit-an sa basurahan daplin sa karsada sa Barangay Cansojong sa Talisay City nadakpan na sa kapolisan.

Giila ang suspek nga si Renier Rommel Albularyo Roxas, nga anaa na karon sa kustodiya sa Talisay City Police human siya nadakpan.

Ang suspek pag-umangkon ra sa biktima nga si Pilar Basilio nga nisibat human sa krimen.

Gikumpirma ni Talisay City Mayor Gerald Anthony “Samsam” Gullas ug Talisay City Police chief PLtCol. Homobuno Sayon ang pagkadakop kang Roxas ug ang pagkumpirma sa identity sa biktima.

Matud pa ni Gullas sa iyang post sa social media, nitakdo ang resulta sa DNA examination nga gihimo sa kapulisan sa sample ni Basilio, nga gireport nga missing sa Barangay San Isidro, Talisay City.

Sumala sa mayor, ang DNA result ug padayong imbestigasyon sa kapulisan nisangpot sa pagkatumbok kang Roxas isip suspek sa pagkamatay ni Basilio.

Sa pagpatuman sa search warrant, gisusi una sa kapulisan ang sakyanan ug motorsiklo nga giingong konektado sa suspek  sa wala pa gipadayon ang pagserbisyo sa warrant sa iyang gipuy-ang balay.

Atol sa operasyon, nakasakmit usab ang kapulisan og mga gidudahang ilegal nga droga ug armas.

Nasubay sab sa kapulisan ug sa koordinasyon sa Zamboanga Police Provincial Office nga si Roxas aduna pay laing giatubang nga murder case. Niadtong Hulyo 11, 2026, nakaplagan ang putol nga ulo sa usa ka babaye sa Barangay Cansojong. Anang adlawa, gi-report usab nga missing si Basilio.

Padayon ang imbestigasyon aron matino ang tibuok sirkumstansiya sa iyang pagpatay kaniya.