Elasto Painters nakasagunson og upat na ka daog

CEBU, Philippines — Ang Rain or Shine Elasto Painters nakaipsot sa Meralco Bolts, 85-83, alang sa ikaupat nilang sagunson nga daog sa PBA Season 50 Governors' Cup niadtong Domingo, Agosto 2, didto sa Smart Araneta Coliseum.

Si Aaron Fuller mitagak og walo sa iyang 25 puntos sa katapusang kuwarter, apil ang krusyal niyang layup nga nakapalabaw sa ROS sa pinal nga 38 segundos.

Duna pa untay tsansa ang Bolts nga makapuwersa og overtime apan si Bong Quinto nasipyat sa duha niya ka free throws sa katapusang 2.5 segundos.

Ang E-Painters nagkupot na karong og 4-2 rekord samtang ang Bolts natagak sa 2-4 human nakatilaw sa ikatulo nilang sunod-sunod nga pildi. Sa laing bahin, ang Magnolia Hotshots midemolis sa Barangay Ginebra Gin Kings, 88-73, aron inaton ang ilang baraha ngadto sa 2-3 tabla sa Ginebra.

Ang Hotshots wala na molingi pa sukad sila mikulit og 53-43 nga labaw sa halfftime, nga ila pang gipaburot ngadto sa 20 puntos sa second half.

Si Zave Lucero mibirada og 22 sa iyang 24 puntos sa first half alang sa Magnolia. Ang bag-o nilang import nga si KJ Buffen mipupo og 23 puntos samtang ang beteranong si Ian Sangalang midugang og 16 puntos alang sa Hotshots.

Si Stephen Holt maoy nangu sa Gin Kings uban ang 17 puntos samtang ang import nilang si Lewis Grigsby nalimitahan ngadto lamang sa 15 puntos.