Traysikol vs motor, usa patay

CEBU, Philippines — Patay ang 58-anyos nga traysikol drayber human nabanggaan sa usa ka motorsiklo sa Sitio Luknay, Barangay South Poblacion, San Fernando, alas-9 sa gabii niadtong Domingo, Septiyembre 6.

Giila ang namatay sa alyas nga Jeremias, 58, biyudo, ug residente sa Barangay South Poblacion.

Naangol usab sa aksidente ang iyang 47-anyos nga pasahero nga si alyas Mary, usa ka empleyado sa lokal nga kagamhanan ug residente sa Barangay Tinubdan, San Fernando, ingon man ang 24-anyos nga motorcycle rider nga si alyas Germil, residente sa Barangay Basak sa maong siyudad.

Base sa inisyal nga imbestigasyon sa San Fernando Municipal Police Station, nagkasugat ang traysikol ug motorsiklo. Padulong sa Barangay Tinubdan ang traysikol samtang paingon sa National Highway ang motorsiklo. Giingong misulod sa pikas lane ang traysikol pag-abot niini sa dapit sa insidente hinungdan nga naigo niini ang motorsiklo.

Tungod sa kusog sa impact, nangahulog sa dalan ang duha ka drayber ug naangol.

Gidala sila ngadto sa Cebu Provincial Hospital apan gideklarar nga dead on arrival si Jeremias, samtang nagpabilin sa ospital ang pasahero sa traysikol ug ang motorcycle rider.

Padayon pang gitino sa San Fernando Municipal Police Station ang eksaktong mga sirkumstansiya sa nahitabong aksidente.—  IBM BANAT NEWS